Todalen og Åsskard
Jubilerer med julemusikk
Søndagens kyrkjekonsertar med koret P17, solistar og orkester i Todalen og Åsskard har jula som tema. Samtidig feirar songarane 50-årsjubileum.
Kor, solistar og orkester inviterer syngande og lyttande publikum til musikalsk julefest. Jubilantane har henta fram godbitar frå eldre og nyare program.
Høgtidsmusikk – med kantate
Sentralt står Arne Dagsviks kantate «I denne søte juletid» - ei vakker og uttrykksfull formidling av juleevangeliet. Dertil blir det kjent, folkeleg og klassisk høgtidsmusikk – Alnæs’ «Julemotett», «Stille natt» (i yndig originalversjon), norsk og utanlansk i utsøkt blanding. Allsongen er ikkje glømt – her får alle delta i «deilige, himmelblå og betlehemske» juleperler!
Orkester og solistar
Profesjonelle musikarar frå fem land dannar orkesteret: Trond Saltnes, Odd Sonntag og Synnøve Hammervold (fiolin), Anna Ostachowska (bratsj), Zhala Aliyeva Einarsen (cello), Jasmina Zivic (fløyte) og Ebba Ringmar (obo). Så både kor, solistar og forsamling får solid, internasjonalt tonefølgje!
Solistar på begge konsertane er Øystein Moe, Nora Bøe og Turid Røen Kroknes. Turid syng m.a. utdrag frå Bachs «Juleoratorium». I Åsskard deltek også den talentfulle duoen Ellen Fiske (vokal) og Johanne Holten (piano) i to nyare julemelodiar.
Annonse
Formidling i femti år
Konsertane markerer 50-års jubileum for dette lokale kormiljøet. Det starta som Åsskard Kyrkjekor i 1975. Samarbeid med Todalskoret og andre songarar førte etter kvart til felleskoret Prosjekt 17.
Koristane, ofte med musikarar som no i helga, har gjennom eit halvt hundreår formidla breitt repertoar, frå slagerlåter til klassisk.
Og dei gler seg til å jubilere med juletonar i Todalen og Åsskard denne adventssøndagen!
ANNONSER:
