Skuleløp for årets TV-aksjon

Søndag 22. oktober er datoen for årets TV-aksjon. Elevane ved Todalen og Stangvik Oppvekstsenter markerte dagen med skuleløp no på fredag.

Årets tema for TV-aksjonen er «La barn leve i fred» og går til Redd Barna sitt arbeid for å hjelpe barn ramma av krig og konflikt. Målet er å gi barn moglegheit til å leike, lære og leve i fred (www.reddbarna.no).

Elevane har hatt dette som tema i undervisninga denne veka, og for å markere aksjonen på ein minneverdig måte, arrangerte skulen eit skuleløp der elevane fekk bidra på sin måte. Dei sprang så mange rundar som mogleg rundt skoleområdet, og innsatsen deira var heilt fantastisk. Sola skein, musikken spelte i bakgrunnen, og det var skikkeleg god stemning i skulegarden.

Mali og Ann Gladys tykkjer skoleløpet er viktig fordi dei vil hjelpe barna som treng det, med å få eit godt liv. 

Kristian fortel at dei i dag har sprunge rundt skuleområdet for å samle inn pengar til å hjelpe barn som lever i krig. —Det finst mange som er i krigsområde no, som kanskje har ødelagte hus, ødelagte bilar, som ikkje kjem seg vidare, seier Kristian. Sjølv har han sprunge 15 rundar.

Familie og venner har også hatt moglegheit til å støtte TV-aksjonen gjennom skulen sin spleis. I tillegg har dei tilsette på skulen bidrege ved å gi 1 kr per runde elevane sprang. Saman klarte elevane på 1. til 7. trinn å springe heile 904 rundar! Det var tydeleg kor engasjerte og dedikerte elevane var til å hjelpe andre.

Medan skuledagen nærma seg slutten, vart det servert varm kakao til alle elevane som ei belønning for innsatsen deira. Det blei ei fin markering som elevane truleg vil hugse lenge.

Om du vil støtte TV-aksjonen gjennom skulen sin spleis kan du gjere det her: https://www.spleis.no/project/340541