Stor formidlings­kunst og dramatikk i Todalen

Det var stor kunst publikum fekk servert under torsdagens operapub i Todalen ungdomshus. Med eit repertoar med store komponistar som Mozart, Guiseppe Verdi, Puccini George Bizet, George Gershwin, Jerome Kern og Oscar Hammerstein var bordet dekka for eit fullstappa ungdomshus.

Det er litt av eit lag av internasjonale operasongarar Stangvikfestivalen har henta, sopran Anne Maleza-Kutny, mezzosopran Rebecca Fjällsby, tenor Linard Vrielink, baryton Jaka Mihelac, baryton Adam Kutny, Erik Rosenius og ikkje minst festivalens eige Sigrid Vetleseter Bøe. Saman med pianist Hedda Hansen Berg skapte dei ei harmonisk og intim atmosfære for dei frammøtte.

Gjennom tre sett fekk vi ta del i nokon av dei største numra i operahistoria. Allereie etter eit fantastisk fyrste sett, satt publikum spent og venta på kva som venta dei vidare. Det var nesten som om den fyrste pausen kom litt for tidleg, eller at den varte litt for lenge. Stemninga utover andre og tredje sett steig i takt med vokalprestasjonane.

Som eit av mange høgdepunkt må arien «Quando m`en vo» frå «La boheme» av Puccini trekkast fram, frå andre sett i konserten. Publikum vart sett rett i ei scene frå operaen og tok del i dramaet som utspann seg i lokalet. Med Vetleseter Bøe i hovudrolla og dei andre songarane godt plassert rundt i lokalet, fekk publikum vellyd frå alle kantar.

Eit anna av mange høgdepunkt kom på siste sett. Erik Rosenius versjon av «Ol` man river» frå musikalen «Show Boat», med musikalitet og formidlingsevne ein sjeldan får oppleve. Godt hjelpt av eit fenomenalt pianospel frå Hedda Hansen Berg.

Det er mykje spennande i vente dei neste dagane under Stangvikfestivalen, torsdagens konsert var eit solid bevis på kva for kvalitet det er på årets festival.

Fleire bilete frå konserten:

---