Familiedag i Vårsøglandet
Laurdag vart det liv og røre i foajeen på kulturhuset under Vårsøghelga. Regnet flytta festen inn, men la ingen dempar på stemninga med sjonglering, dikt og maskotar. Kulturskuleelevane runda av med ei imponerande forestilling.
Laurdag vart ein innhaldsrik dag for små og store under Vårsøghelga i Surnadal. Det planlagde familietorget ved Kulturhustorget måtte flyttast inn i foajeen grunna regnvêret, men det la ingen dempar på stemninga.
Sjonglering og maskot-fest
Inne på kulturhuset vart det starta med sjongleringsshow frå Circoyas som fenga både store og små. Mange maskotar dukka opp og helsa på barna, og spesielt stor jubel vart det da Brannbamsen Bjørnis kom.
Diktmønstring i nye rammer
Ein ny vri i år var at den tradisjonelle diktmønstringa vart lagt til familietorget, i staden for Kleivakvelden. Elevar frå dei fire skulane i kommunen framførte eigne dikt, leidd av Svein Sæter. Diktmønstringa er ein tradisjon under Vårsøghelga som mange set stor pris på.
Vårsøglandet
Annonse
Dagen vart avslutta med kulturskulen si forestilling Vårsøglandet, ei forestilling som baud på både fin musikk og humoristiske innslag. Publikum fekk møte kjende bygdeskikkelsar som Hans Hyldbakk, Henning Sommerro og Dordi Skuggevik, levandegjort av dei unge skodespelarane og musikarane.
