Julekonsert med godteri - også i andakten

Blæst'n opna konserten med brask og bram - Hark the Herald Angels Sing, og alle i den fullsette kirka lytta. Så gjekk dei over til det litt varare, lyse hovedtemaet frå filmen "Tre nøtter til Askepott" etter at dirigent for Blæst'n Olav Morten Tørset hadde ønska alle velkomne. Med melodien "Bella Notte" (Lee/Bruke) lova dei at dette ville bli ein fin kveld.

Kor Gøttj framførte først "White Christmas" (Irving Berlin), ein julemelodi som har mange år bak seg. Dei følgde opp med Astid Smedplass sin mykje nyare "Når snøen smelter" med Mayla Nilsen Nordlund som solist med sin inderlege og mjuke stemme.

Med "Julenatt" av Tore Aas fekk dei markert at -Ventetiden er over - snart.

Kveldens nye bekjentskap for mange var Karianne - gitar og song, Johanne - flygel og Sigve Holten - bass og song, frå Surnadal. En musikalsk familie som vi gjerne hører meir frå!

Dei opna med Vazelina Bilopphøggers "Hem'att te jul," og det var det nok mange fleire enn dei som var i kirka som var denne fredagskvelden.  "Vise ved vintersolkverv" av Hekla Sålstrenga var andre innslaget frå søskenflokken.

Sokneprest Lene Gåsvatn heldt ein munter, men tankevekkande andakt. Utgangspunktet var å stele 

- Nei, ikkje juletre, understreka presten. Ho skjøna at mange kunne tenkje på eit lesarinnlegg av henne på Trollheimsporten nyleg. 

- Nei, det skal handle om ei  lita jente som foretok eit smågodt-tjuveri på Deltrans medan faren snakka med Morten, eller kanskje det var Olav Morten, dirigenten til Blæst'n.

Vel ute i bilen oppdaga faren godteriet. Det bars rett inn i butikken att, tilbakelevering og skikkeleg oppgjør! Lene viste fram godteposen.

Morten tok imot dei, men historia endte ikkje slik du venta. Morten sa at jenta berre kunne behalde godteriet. Og ikkje berre det, han gav ho enda litt meir godteri! Lene viste fram ein pose til.

Dette var sjølvsagt ikkje ei oppfordring til å dra på Deltrans å stele godteri! Dette handla om nåde, å få meir enn vi kan gje tilbake. Ei overraskelse.

- Så til Gud! Gud gir oss nåde. Han er minst like raus som Morten (og Olav Morten) på Deltrans!

AMEN  - avslutta Lene prest.

Det vart meir alvor under konserten. I første rekka hos Blæst'n var det ei tom stol med klarinetteske på og ein velbrukt klarinett framom. Dirigent Olav Morten Tørset forklarte at det var plassen til Jan Sturla Jensvold som døde denne veka. Jan Sturla hadde vore viktig for Blæst'n. Klarinett var instrumentet hans, men han sørga og for at Blæst'n hadde sin eigen trekkspellar, og han var bussjåfør for dei. 

Olav Morten mintes at Jan Sturla somme tider ønska å auke tempoet under øving og oppvarming. Han foreslo for Blæst'n at dei skulle spele nr. 42 i oppvarmingsheftet. Dermed fekk vi ei lettbeint framføring av melodien til songen "Hvilken venn vi har i Jesus." (Sjå tekst i ramme).

Tilbake i konsertmodus var det tid for mindre grupper.

Først ut var Bettina Røen Helgetun. "Når himmelen faller ned," av Anne Grete Preus vart framført med Dagrun Løset ved flygelet. Vibeke Langli, tvillingsøster til Bettina slo seg i lag med dei og vi fekk høre Elle Melle sin "Himmelhøge sti."

Siste par ut var Marit Løfaldli og Ronny Kjøsen som tok oss lokalt med teksta "Advent" av Astrid Krog Halse og "Jul" av Øyvind Hoset. Ronny Kjøsen stod bak melodiane på begge songane og akkompagnerte først på trekkspel, så på flygel, før han drog opp på galleriet for å betjene orgelet.

Da steig kulturledar Morten Møller fram med blomsterbukett. Dermed måtte Ronny ned i kirka att, for kommunen ønska å ære han fordi han nettopp hadde fått Trøndelag Fylkeskommune sin kulturpris.

Vel oppe ved orgelet leda prisvinnaren forsamlinga gjennom allsong av "Glade Jul" før Blæst'n runda av konserten med "Walking in the Air" frå filmen "The Snowman" og til slutt "Julen er her" med flott trompetsolo av dirigent Olav Morten Tørset.

Om det var nokon som ikkje var i julestemning da, så vart dei det i alle fall dei neste minutta. Da vart konserten avslutta tradisjonelt med "Deilig er jorden" med kor, korps, orgel og ståande forsamling.