Nordmørsk og allsidig

- Vi har heile Nordmøre som stoffområde og lesarkrets, men er også frimodige nok til å vise heimbygda vår i full breidde, seier utgjevar Bøfjorden Historielag. 

Innhaldet i 12. årgang spenner frå portrett av markante personar
(Hyldbakk, meistersnikkar Magnus Aasgaard, «Pedagogjen» Bjarne Megard og fleire) via butikkhistorie og skuteskjebner til språkperler og fotballnostalgi.

Artikkelen «Fjurulangs» er essensiell bygdehistorie – med idyll og masse levd liv: Sagbruk i 400 år, meieridrift, fraktefart og tusentals bygde (og brukte!) båtar. Og her får du tips til dorgetur langs unikt kulturlandskap!

Drama

Boka røpar mykje glømt dramatikk: Kva hendte den tragiske mainatta i 1819? Eller da snøskredet tok stua i Biren ein stormdag i 1772? Visste du at ein 15-årig sildefiskar vart knivdrepen på desse trakter i 1879? Og korleis kunne nazistar i nabolaget sende ein 7-barnsfar til fangeleiren som er kalla «et glimt av helvete»?

Her er stoff om sommarfjøsa, om DS «Hjelmen I» frå bedding i Snekkvika til isgrava i Kvitesjøen, om Leikarvollen stadion og om kyrkjesmeden Hans Jacobsen. Kva tankar hadde forresten Halsa-konservator Ola «Kunst» om kyrkja si – som snart feirar 300 år? 

Heimspråk og tur-tips

Stykket «Heimspråket» er ei perlekjede av nordmørsk dialekt og eldre norsk. Kvifor seier vi «skråsikkert», «marsipan» og «Hokus Pokus Filiokus»?

Vil du høre om gamle dagars storhetstid i avsidesliggande Båtvika eller kva bøfjording det var som i 1738 vart dømt «til at miste sin Hud i Fængsel» for tjuveri?

 - Da kan du bla i årets «Gamle Nordmør»! seier styret i Bøfjorden Historielag. Dagens reportasje er ei påminning om at boka er komen. - Fotoglimt og detaljar kjem seinare, lovar dei.