Populært forfattarbesøk

Ho er ein av dei desidert mest leste forfattarane dei siste åra. Nina Lykke kjem til Surnadal på tysdag og til Rindal på onsdag.

Ho debuterte i 2010 med den kritikarroste novellesamlinga «Orgien og andre fortellinger». Romanen «Oppløsningstendenser» (2013) fekk også strålande mottaking. Og i 2016 fekk Nina Lykke sitt store gjennombrot med romanen «Nei og atter nei»; og romanen vart også ein suksess i Sverige og Tyskland.

«Full spredning - en legeroman» er Nina Lykkes fjerde bok og for den vann ho Brageprisen i 2019. Boka har så langt fått eit opplag på knappe 100.000 eksemplarar, og «Full spredning» har så langt spreidd seg vidare ut til nærare tjue land.

Nina Lykke vil i foredraget fortelje om sitt forfattarskap, om kvifor ho skriv, kvifor det er så vanskeleg, kvar stoffet kjem frå og kvifor det verkar som om vi gjer så mykje rart i liva våre.

Arrangørar av forfattartreffet i Surnadal tysdag 19.oktober kl. 19.30 er Surnadal Folkeakademi og biblioteket, og det er fri inngang på biblioteket.

Og dagen etter, onsdag kl. 19.30 i Attanova (Rindalshuset), er det folkeakademiet i Rindal og biblioteket/kulturkontoret som er arrangørar. Og det er også fri inngang her.