Stå opp for naturen i Møre og Romsdal

Oppmoding: Spør politikarane, sjå i partiprogrammet og stem på parti som set natur og klima før overforbruk og rovdrift på klodens ressursar.

· Fjordane våre er fiskerike, reine og vakre. Dei kan øydeleggast! Skjerp krava til oppdrettsanlegg, rydd opp i utslepp av kloakk, avrenning og slam, ikkje bygg i strandsona.

· Elvane og fossane er smykker i Vestlandsdalane. Vassføring raskt opp og ned, frodande flaum, varme sommarelvar, frosne vinterelvar. Spektakulære opplevingar av flora og fauna i heilt spesielle naturtypar. Turar med fiskestong etter småaure. Dette kan øydeleggast av ureining og kraftutbygging. Dei resterande ikkje utbygde elvestrekningane må få renne fritt.

· Inngrepsfrie fjellområde er gull verd for friluftsliv og reiseliv. Denne verdifulle ressursen har minka drastisk dei siste tiåra, oppeten av vegar, kraftliner, hyttefelt og andre inngrep. Stor-etarane vindkraft og gondolar har ikkje plass i urørt fjellheim.

· Blomsterenga er no sjeldan. Nitrogengjødsling og mange slåtter er effektivt for stor avling i landbruket, men vi kan miste blåklokker, prestekragar, harerug, tiriltunge og fleire. Insekt som vi er avhengige av for at bær, frukt og anna skal kunne formeire seg må ha blomster. La difor vegkantar og areal i kulturlandskapet blomstre.

· Ulv, jerv, bjørn, gaupe og ørn høyrer til i naturen. Dei kan vere plagsame for husdyrbøndene, men vi må finne driftsformer som er berekraftige sjølv med disse naturens «odelsdyr» til stade.

· Friluftsliv av det enkle slaget er Nordmenn si mest populære aktivitet. Padling, skiturar og fotturar er meir lokkande for tilflytting og for dei unge som vel studiestad enn nye hyttefelt.

· Skog og tre bind karbon, gir verdifulle produkt og er viktig i mange bygder. Men flatehogst og planting er ikkje alltid det rette. Andre hogstformer og vern av den eldste skogen er betre for natur og klima. I mange naturtypar er furu og lauvtre dei rette treslaga.

· Barn og unge må lære å bli glad i naturen. Pass på froskedammen, siklebekken og skogholtet. Ved byggefelt, barnehagar og skuler er dette ekstra viktig.

· Skulehagar er noko alle skuleeigarar (kommunar) bør legge til rette for! Eit billig og enkelt tiltak som kan vere suksess for mange på mange vis.

Bærekraftig utvikling betyr at vi tek vare på naturen, ikkje brukar opp naturen.

Naturvernforbundet i Møre og Romsdal
Ved Øystein Folden (Fylkessekretær) og Per Ingebrigt Karbø (Fylkesleiar)