Aktivitetskveld i Kyrkjestua:
Påskepynt og god stemning
Tysdagens påskeverksted i Åsskardkyrkja samla litt færre aktørar enn vanleg. Mange tilbod kolliderte denne kvelden. Men at barna har mykje å velje imellom, er jo i seg sjøl berre positivt.
- Og det var stor stemning og mykje kreativitet blant dei som kom, seier leiar og instruktør Randi Vetleseter Bøe. Ho stilte med utstyr og idear som deltakarane så å seie kasta seg over.
Formingstimen gjekk med liv og lyst. Arbeidsinnsatsen var upåklageleg. Med saks, lim og fargeutstyr vart papir, fjær, beger og dorullkjerner til artig og dekorativ påskepynt.
Til slutt serverte soknerådets Kari Johanne nydeleg kveldsmat. Og ved matbordet var stemninga stor som alltid på slike kveldar.
Kyrkja kan vera arena for mykje kreativt samver. Og påbygget «Kyrkjestua» i Åsskard, som Magnus Sætervik Aasgaard reiste etter initiativ av sokneprest Ingvaldstad i 1960, er eit ideelt lokale for treff av alle slag.
Ikkje minst når små og store kan samlast til skapande aktivitet som denne marskvelden.
