Jonsvaka - med folkemusikk:

Et kor i ei kirke.
P17 avrundar sesongen med fredagens Jonsvaka. Vi nemner gjerne at desse korkappene er designa av Kristine Halse Hagen (1937-2018) – tekstilkunstnaren som Halsa Kunstlag og Halsa Bygdekvinnelag nyleg har heidra med minneutstilling.

Opnar ei skattkiste

Sia 1982 har Åsskard feira Jonsvaka. Fredag 20. juni er det folkemusikkveld - med Runa Kvalsund, kor og instrument.

Bernt G. Bøe INNSENDT BIDRAG
Publisert

- Eg har plukka fram godbitar etter fine tradisjonsberarar på Nordmøre, fortel Runa – som er nyutdanna «folkesongar». 

Kjelder bak songane er Marit Sivertsdatter Glærem, Magnhild Almhjell, Christen Bruseth, John Røen, Erik Ansnes og mange andre.

Fotomontasje av to gamle portrettbilder.
To av dei fine tonekjeldene: Magnhild Almhjell (Tingvoll) og Christen Bruseth – todaling som vart kulturhøvding i Stangvik.

På «gammelmåten»

– Det blir yndige - og dramatiske - viser, salmetonar og kanskje kringehauk og «trallating», seier Runa, som også vil fortelje om kjeldene sine og om korleis folketonane har vorte forma opp gjennom tida. 

Gjennom grundig studium i faget formidlar ho stoffet på «gammelmåten».

Portrettbilde av ei dame.
Runa Kvalsund er nyutdanna i folkesong – eit fag ho kjenner betre enn dei fleste. Ho har elles vore medredaktør i Klassekampen, er blant landets fremste oversettarar - og nybaka mor!

Samlarane Kristian Halse (1858-1939) og Edvard Bræin (1887-1957), som såg verdien av folkemusikken og skreiv ned over tusen songar og slåttar, betyr mykje i eit slikt program.

Fotomontasje med to gamle portrettbilder, et åkle og ei gammel kiste.
Samlarane Kristian Halse og Edvard Bræin har lagt over tusen folketoneperler i den nordmørske skattkista! Bak bileta eit åkle som «nordmørsvevens førstedame» Johanna Halse, kona til Kristian, har vove.
Fotomontasje av et hus, noter og et gammelt portrettbilde av ei dame.
Etter Johanna Taknes har vi «Som den gylne sol» i salmeboka. Ho song den til Bræin i versjon etter bestefar Jakob Taknes – øvst. I salmeboka er den litt enklare (nedst). Eika her framfor Taknes-stua i Halsa var det Johanna som planta i si tid.

Allsidig og ukjent

Koret Prosjekt 17 har henta lokale og utanlandske folketonar. Forsamlinga deltek i allsong - frå Halsa, Osmarka, Sverige og Russland. Tove Elin Strand spelar fløyte.

Ei dame som spiller tverrfløyte.
Tove Elin Strand er med på fløyte.

Kjenner du dramaet bak «Fenstadvisa»? Korleis var «Julverset» bruka? Og kva er linken mellom Gjendine Slaaliens «Baadnlaat» og arrangørkoret Prosjekt 17? Svar blir røpa på konserten.

To damer og en mann en en sofa. De viser fram gamle portrettbilder.
Randi Bøe, Einar Husby og Borghild Talgø frå koret lovar vakre tonar etter Gjendine Slaalien, Christen Bruseth og eit tjuetal andre kjelder. - Men kva Gjendine på biletet hadde med min bestefar å gjera, det røpar vi først på konserten! seier Randi.

Todalsk folketonemesse

Kor og instrument framfører «Folketonemesse frå Todalen». Her brukar Bernt Bøe salmetonar etter Tomina Husby og Ane Husby og feleslåttar etter Hallvard Ørsal som «akkomapgnement» til sine eigne melodiar over gudstenesteledda Kyrie, Gloria, Credo, Sanctus og Agnus Dei. (Messa markerer såleis også 150-årsjubileet for Hallvard Spellmann!)

Noterhefter og gamle portrettbilder på et bord.
Songaren Tomina Husby og spellmannen Hallvard Ørsal (150-årsjubilant) er kjelder til tradisjonsmeldiane i «Folketonemesse frå Todalen».

Gjeninnført høgtid

Sankt Hans, 24. juni, var kyrkjeleg høgtidsdag til 1770. Kvelden før var det tidebøn («vaka» - jonsok, jonsvaka, dialekt «jensuku»). Bålbrenning og andre førkristne skikkar var fletta inn i feiringa.

I 1982 «gjeninnførte» Åsskard sokn Jonsvaka som kyrkjeleg kulturkveld, med hovudvekt på midnattskonsert attåt andre kulturinnslag - og sosial kaffestund.

Kor og profesjonelle musikarar har alltid prega programma – med stor variasjon: Frå gregoriansk til moderne, frå klassisk til – som no – folkemusikk.

Kulturkveld i tre bolkar

Etter vanleg mønster blir Jonsvaka tre-delt: Klokka 21 startar ein med biletkåseri om folkemusikk og toneskaparar. Etter eit sosialt kaffesamver ringer klokkene inn til konserten «Folkemusikkens skattkiste».

Kveldens billett inkluderer både kåseri, kaffe og konsert.

Velkomne til ein rikhaldig kulturkveld!

ANNONSE:

musikk konsert historie arrangement kultur kyrkja i surnadal nyheter surnadalsnytt åsskard kyrkje
Powered by Labrador CMS