150-årsjubileum: Inviterer til kyrkjebasar

Av jubileumskomiteens mange planer framover året er laurdagens basar neste stopp. Den er ein felles dugnad for å skaffe midlar til kyrkjearbeidet generelt og jubileet spesielt.

Også loppis

Blant aktørane har Åsskard Bygdekvinnelag ansvar for basarbordet. Kontaktperson Gunda Bele har alt fått ein del gevinstar, men tek imot fleire. Basarbøker ligg på førehand ute i lokalbutikkane.

Parallelt med vanleg basar blir det også loppemarked – organisert av Bæverfjord Idrettslag. - Den som vil gi lopper, tek kontakt med Tove Bævre og kan levere sine ting i Grendahuset i kveldinga tysdag 21. eller fredag 24. april.

Samarbeid – og allsong

Laga i Åsskard gjer felles innsats for å feire kyrkja si. Med i jubileumskomiteen er folk frå bygdekvinnelaget, dei to idrettslaga, Bøfjorden Historielag, grendahuset, Bøfjorden Teaterlag og Åsskard sokneråd. Til basaren er mange praktiske oppgåver fordelt.

På kaffeborda i Grendahuset blir det også allsong-ark å finne. I ei lita Vårsong-økt får alle stemme i kjente og kjære vers. Ei gruppe frå koret Prosjekt 17 er forsongarar og byr kanskje på eigne innslag.

Jonsvaka ved St. Hans-tider 

Den årvisse kulturkvelden Jonsvaka er også del av jubileet. Den var planlagt til 19. juni, men blir utsett nokre dagar på grunn av konsertkollisjon. På Jonsvaka blir det både historietablå, biletkåseri om kyrkja si historie, kaffe og eit større konsertprogram. Ny dato blir kunngjort.

Utegudsteneste 26. juli 

Grendaplassen på Åsskard er arena for olsokgudstenesta 26. Også her vil litt av historia prege programmet – mellom anna roing frå Bøfjorden med kyrkjebåten «Hjelmkonnå».

Men først altså: Jubileumsbasar på Bøfjorden Grendahus laurdag 25. april.

Og dagen etterpå er det gudsteneste i Åsskard-kyrkja. Her gjer mellom andre prost Vidar Rygh teneste.