Tradisjonell nasjonaldagsfeiring i Todalen
I Todalen har det vore tradisjon med biltog sidan 1950-talet, ein tradisjon som også i år starta sjølve nasjonaldagsfeiringa.
Biltoget hadde start ved Matkroken Todalen, gjekk oppover på nordsida og opp til gammalfabrikken i Brusetmarka.
Her var det ein liten pause for dei knapt seksti køyretøya, før turen gjekk på sørsida nedover bygda og til Todalen ungdomshus.
Film: BG Ansnes
Todalen Idrettslag inviterte til nasjonaldagsfrukost
Todalen Idrettslag inviterte, også i tradisjon tru, til nasjonalfrukost i Todalen ungdomshus rett etter biltoget.
Leiar i Todalen Idrettslag, Endre Talgø, ønskte rundt hundre betalande velkomne til nasjonaldagsfrukost.
Her vart det servert kaldtbord med mykje godt pålegg, salatar og sjølvsagt mange forskjellege sortar varme og kalde drikkar.
Annonse
Leikar for store og små
Etter frukosten, og før det vart servert kaffe og kaker, var det leikar for både store og små. Her var det potetløp og kast på boksar for dei minste, men dei vaksne testa musklane sine gjennom taudraging.
Det var også mogleg å teste balansen på stylter.
Til slutt på programmet under frukosten i ungdomshuset, stod servering av kaffe og kaker.
Avslutta med høgtidsgudsteneste
Nasjonaldagsfeiringa i vart avslutta med høgtidsgudsteneste i Todalen kyrkje.
Det var Todalen Sokneråd som inviterte til høgtidsgudstenesta.
