F.v. Tania Yu Auglend, Aurora Dønheim Berle, Heidi Fiske, Una Langeland Gravvold og Kjell Gunnar Polden.
F.v. Tania Yu Auglend, Aurora Dønheim Berle, Heidi Fiske, Una Langeland Gravvold og Kjell Gunnar Polden.

To sølv og ein bronse i digital TaeKwon-Do-turnering

Publisert

Utøvarane frå Surnadal NTN TaeKwon-Do-klubb har gjort seg positivt bemerka i ei stor, internasjonal turnering i disiplinen mønster.

Turneringa vart gjennomført digitalt, ved at dei påmeldte utøvarane i kvar klasse vart sett opp mot kvarandre, ein og ein, i eit turneringsformat, frå 1/64-finale og heilt fram til finalen. Mønstra vart spelt inn på video på førehand, og kva mønster som skulle gjennomførast i dei ulike rundane vart avgjort ved trekning.

Trollheimsporten skreiv om turneringa onsdag, og no er resultata klare.

Heidi Fiske, som deltek i klassa 1. Dan (svart belte) junior 12-14 år, tok sølv, etter finaletap mot ein italiensk utøvar.

Tania Yu Auglend, som konkurrerer i ei svært tøff klasse for 2. Dan, vann og sølv.

– Tania tapte mot ei frå Japan, som er blant dei beste eg nokon gong har sett. Så no har vi noko å jobbe mot, smiler trenar Kjell Gunnar Polden.

Una Langeland Gravvold og Aurora Dønheim Berle, som begge er på landslaget i sparring, gjorde begge ein god figur i klassa 1. Dan junior 15-17 år.

Dønheim Berle tapte til slutt for ei nederlandsk jente i kvartfinalen, medan Langeland Gravvold tok ein sterk bronsemedalje.

– Vi må vel seie at resultata var over det vi forventa, men eg veit at dei er veldig gode, så overraska er eg ikkje, seier Polden til Trollheimsporten.