Rindalingar i tåkeheimen
Rindal Røde Kors Besøkstjeneste arrangerte tirsdag ein grensesprengande busstur for medlemmer og andre interesserte. Turen kryssa fire fylkesgrenser, men var innom berre to fylke.
Turen starta på Rindal Rutebilstasjon med Kjell Bråten som rutinert sjåfør. Vi kjørte opp Rindalen og Rørdalen og plukka opp passasjerar, den siste og eldste på Gåsvatna.
Orkland - Heim
Turen gjekk så gjennom Hoston og Svorkbygda til den gamle Hemnevegen, opp mot Høgkjølen, for å følgje E39 (med fartsgrense 90!) til Stokkhaugen. Der svinga vi nordvestover etter 714 - Laksevegen til Våvatnet, for så å svinge vestover til Vennastranda, Berdal, Holla og Kyrksæterøra.
Tåkeheimen (toppbildet)
Frå Kyrksæterøra gjekk turen etter Rv680 over Brekka for å nyte utsikta over Årvågsfjorden. Da hamna vi i tåkeheimen! Leitt for dei som ikkje hadde opplevd denne flotte utsikta før. Heldigvis var veret langt betre på resten av turen.
Gammellåven
Det som møtte oss på Gammellåven hos Kari og Arve Goa gjorde at humøret raskt var på topp igjen. Låven og kjørbrua var innreidd som selskapslokale, gardsbutikk og gardsmuseum.
Her var borda dekka med lunsjtallerken, velsmakande, mellom anna med spekemat frå sauene som familien hadde i fjøset under låven. Måltidet runda vi av med fruktdessert og kaffe. Mange handla med seg både saueskinn, salta lammekjøtt og spekemat.
Arve Goa kunne fortelje at første skriftlege kjelda nemner bruket i 1540. No er det fire generasjonar som er knytta til bruket.
Gammellåven er open for servering og salg i helgane.
Aure
Neste stopp var Aure sentrum. Dette var det ein lengre stopp der folk kunne gjere seg litt kjent ved å gå rundt i sentrumsområdet, handle i butikksenteret og kose seg med kaffe og kake.
Nedafor ser du bilde av to bautasteinar som stod ved Aure kyrkje.
Heimtur
Heimturen gjekk via ferga Aresvika - Hennset, Halsa og Surnadal. Etter mesta 10 timars tur med varierande veg- og verstandard, var det godt å komme heim til kjente trakter med gode minner frå bygdene i grenseland mellom Møre og Trøndelag.
Turen var godt planlagt av Anne Bjørnholm, som bur i Aure, og Kjellaug Foseide, som er født på Vennastranda i Snillfjord. Det var nok grunnen til at turruta vart slik.
