Vårkonsert med lokal stjernetrio
Dei har sett området vårt på kartet - både nasjonalt og i Europa. Laurdag 6. april kjem Erling With Aasgård, Anders Larsen og Sigrid Vetleseter Bøe med ein stemningsfull Vårkonsert til Åsskard-kyrkja!
Frå musikkens skattkiste serverer dei perler som ein elles må reise langt for å høre. Konserten vil fryde alle sine ører.
![Både Anders og dette historiske instrumentet er fryd for musikkøret. Og bogen er frå Paris 1850! En mann som spiller fiolin.](https://image.trollheimsporten.no/281729.webp?imageId=281729&x=0.00&y=2.17&cropw=100.00&croph=85.54&width=720&height=700&format=jpg)
Anders lovar oss Svendsens «Romanse» og Massenets «Meditasjon» på sin edle Testore-fiolin (bygd i Milano 1735). Berre den fela er verdt besøket! Både som solist og symfonimusikar i Trondheim har surnadalingen Anders eit nært forhold til dette klassiske stoffet.
![Sigrid syng like gjerne i heimekyrkja si som på operascenen. Her som Lady Macbeth på Läckö Slott i fjor sommar. Ei dame sminket og kledd for operascenen.](https://image.trollheimsporten.no/281725.webp?imageId=281725&x=0.00&y=5.43&cropw=100.00&croph=94.57&width=960&height=980&format=jpg)
Sigrid gler seg til å koma heim og fylle kyrkja si med store tonar av Mozart, Haydn og Brahms ved sida av smågodt av yndlingen Edvard Grieg. Ho er for tida i full sving med Wagners «Parsifal» på Kungliga Operan i Stockholm.
![Erling så å seie «vaks opp» på dette orgelet i Åsskard kyrkje. No deler han sin kunst med heimbygda. En mann ved et kirkeorgel.](https://image.trollheimsporten.no/281727.webp?imageId=281727&x=2.36&y=10.44&cropw=92.00&croph=85.11&width=960&height=798&format=jpg)
Erling kompar dei to andre, men lovar også orgelbrus av Mozart og Bach, blant anna den artige og folkelege «Bondefugen».
Som trio samlar Sigrid, Anders og Erling seg i lekre klangar av Richard Strauss og G. F. Handel.
Erling fortel at konserten markerer minnet om hans far, Bjarte With Aasgård, som døde i fjor. Minnegåva frå gravferda dekkjer utgiftene. - Difor er konserten heilt gratis for publikum, seier han. - Men den som vil, kan gjerne gi ein kollekt til kyrkjemusikalsk arbeid i Åsskard!
Soknerådet er arrangør og håpar folk her heime kjenner si besøkelsestid. Det kan bli lenge til neste gong ein slik trio er på heimetraktene!
ANNONSE:
![Vårkonsert med lokal stjernetrio](https://image.trollheimsporten.no/281723.webp?imageId=281723&x=0.00&y=0.00&cropw=100.00&croph=100.00&width=960&height=1354&format=jpg)