Hujedamej! Emil i Lønneberget fyller 60 år!

I 2023 er det 60 år sidan Astrid Lindgren skreiv si første bok om Emil i Lønneberget. Markeringa på Todalen og Stangvik Oppvekstsenter viser at fortellingane om Emil fenger like godt i dag, som for 60 år sidan.

Elevane på 1. til 7. trinn har denne veka markert 60års-dagen til Emil frå Lønneberget med lesedag. Elevane har blitt kjend med folket frå Katthult gjennom høgtlesing, stillelesing, film og ulike aktivitetar, til dømes «sett hale på grisen». Klassane har óg dekorert klasseromma og blitt kjend med forfattaren Astrid Lindgren.

Emil er ein karakter som er lett å like for store og små! Han har eit hjarte av gull, og vil berre hjelpe dei rundt seg, men ofte blir det ikkje som han hadde tenkt seg. Det blei mykje latter i klasseromma da elevane fekk sjå og høyre historiene om rampestrekane til Emil.

1.og 2. klasse skulle teikne det dei hugsa best frå filmen, og da var det da Emil heisa lillesøster Ida opp i flaggstonga dei fleste ville teikne. Alfred og Emil i båten var også populær.

3. og 4. trinn hadde god kjennskap til Emil, men ville finne ut noko dei ikkje visste frå før. Ein elev fann ut at bøkene er oversett til 53 ulike språk, og ein annan elev fann ut at Emil var favorittfiguren til Astrid Lindgren sin pappa, fordi handlinga var lagt til den tida han sjølv var barn. Etterpå gjekk elevane rundt i gangane på skulen og løste ein «Emil-quiz».

Filmen og utklipp frå bøkene fenga også elevane på mellomtrinnet, og dei hadde óg ein Kahoot! om Emil etterpå.

Lesedagen inspirerte til lesing, skriving, leik og samtale rundt tema Emil i Lønneberget.