Fjellgruppas tur til Solemsetra

Tysdag 14. mai gjekk fjellgruppa sin tur til Solemsetra. Vi køyrde til Bæverfjorden, tok av mot Flessa og parkerte ved Oppistua Solem. Så bars det oppover ein riktig bratt skogsveg heilt opp til Oppistusetra Solem, der vi fekk den openbaringa, med det vide utsynet over fjordar, øyer, nes og fjell! Vergudane var og med oss, så med 25 plussgradar, sol og blikkstilt vart det ein lang, god kvil med kaffi, niste og triveleg sosialt lag for oss 30 spreke pensjonistar! Seterskjelet skal vere blant dei eldste og best bevarte i Surnadal.

Setra ligg ekstra fint til her, høgt og fritt over Hamnesfjorden, med utsikt over fleire fjordar og øygarden utanfor. Oppistusetra Solem hadde siste setring i 1944, og Nestusetra Solem som ligg like ved, hadde siste seterdrift i 1942. 

Tankane går til seterlivet i gamle dagar. Vil tru at det var godt å vere seterbudeie her. Mellom fjøsstella vart det vel og litt tid til å nyte utsikta, og kanskje seterbudeiene fekk tid til å besøkje kvarandre.

Vi tok ein annan veg, ein merka tursti nedatt. Eit klokt val, for slik fekk vi fin utsikt på heile nedturen til Litlvika. Deretter vart det ei fin spasetrur på bilvegen langs stranda tilbake til bilane våre ved Oppistua Solem.