Salmekonsert og klassisk
Konserten i Åsskard kyrkje onsdag kombinerer 100-årsjubileet for Nynorsk Salmebok med klassiske kyrkjetonar.
Koret Prosjekt 17 samspelar med songsolistane Turid Røen Kroknes og Sverre Volle. Dei to byr på tonar av Hulaas, Parry og Bach.
Fiolinist Synnøve Hammervold deltek saman med sin talentfulle elev Tarjei Bøe (9 år). Dei spelar til kor og forsamling og byr på friske danserytmer.
Torgrim Tunes les gode vers. Vår lokale salmediktar Sverre Hatle har også bidrag i programmet.
Salmejubileum
Landet rundt blir Nynorsk Salmebok feira i år. Den var redigert av Bernt Støylen, Peter Hognestad og Anders Hovden i 1925, men lenge før dette skapte Elias Blix sin store skatt av nynorske salmar.
Boka kom i bruk i fjerdekvart sokn i landet, deriblant Todalen. I dagens Norsk Salmebok (2013) er Arve Brunvoll og Edvard Hoem markante nynorsk-forfattarar saman med veteranar som Blix og Hovden.
Annonse
- Kveldens sentrale aktør er forsamlinga, seier arrangørane. - Mykje vekt er lagt på allsong av gamle og nye diktarar. Og det i samklang med kor og instrument!
Klassisk for alle
Bibelske tekster har inspirert våre største komponistar til kyrkjemusikk i ulike format. Med songkveldar som dette ønskjer Prosjekt 17 å dele klassiske verk med sambygdingane.
Bach, Handel, Mendelssohn og Beethoven står på programmet – dels med enkeltsongar, dels med utdrag frå kantater og oratorium, som «Hallelujakoret» frå Handels Messias.
Åsskard sokneråd byr på servering i Kyrkjestua etter konserten.
