Kortreist i Todalen: Folketonegudsteneste
Lokal musikk pregar gudstenesta når Torbjørn Brøske søndag takkar av som vikarprest. «Folketonemesse frå Todalen» ber hovudledda i liturgien.
Denne «Missa Todalensis» byggjer på folkesalmetonar etter Tomina Husby og Ane Husby og feleslåttar etter spellmannen Hallvard Ørsal. Til vakre og spenstige todalstonar har så Bernt Bøe laga kormelodiar over dei fem vanlege messeledda. Messa vart komponert til 150-årsjubileet for Todalen kyrkje i 2011.
Springdans som «Gloria»
Tove Strand og Bernt Bøe spelar folkemelodiane på fløyte og piano. Koret P17 legg messeledda oppå. Eksempelvis får Kyrie tonefølgje av «Mit Hjerte altid vanker». Gloria kling til spenstige Ørsal-slåttar, den eine stilisert dans, som uttrykk for «Ære vere Gud».
Men «Folketonemesse frå Todalen» er ikkje underhaldning
og gammeldans! Musikken er først og fremst tilpassa innhaldet i
gudstenesteledda.
Folketonar i heile gudstenesta
All salmesong brukar folketonar - fleire frå Nordmøre. Torbjørn Brøske har forma nattverdliturgien som vekselsong med kyrkjelyden - til tonen «Kling no, Klokka».
Han har denne søndagen si (hittil) siste gudsteneste i Todalen etter vinterens vikarteneste i prestegjeldet.
Attåt hans preike og organisten si Folketonemesse er det vanleg dåp, lesetekster, nattverd og takkoffer.
Og soknerådet har kyrkjekaffen klar når siste strofe av «Missa Todalensis» har tona ut.
