Innhaldsrik og informativ Boligdag

Ordførar Hugo Pedersen ønskte velkommen til Boligdagen 2025. Han understreka at det viktige med dagen var å skape bu- og blilyst. Han meinte det var viktig å skape optimisme for framtida for å oppnå akkurat dette.

Helsehus 

Kommunalsjef Helse- og omsorg, Gunnhild Eidsli orienterte om status for Surnadal helsehus. Surnadal kommune har no motteke tre tilbod på bygging av helsehus, som det blir arbeidd vidare med. I samband med budsjettkonferansen i midten av oktober, vil vi få vite prisen på helsehuset. 18. desember vil kommunestyret vedta om det skal byggast helsehus eller ikkje.

Det er dei to selskapa Dimensjon og Aske som bistår kommunen i arbeidet med det nye helsehuset.

ROP-bustadar 

Ann Elin Stenberg, einingsleiar Helse og familie, orienterte om dei nye bustadane for personar med rus- og psykiske utfordringar (ROP-bustadar), som er under planlegging. Personar med rus- og psykiske utfordringar er ei gruppa som har spesielle behov knytt til bustaden sin for å kunne meistre eigen livssituasjon.

Arbeidsgruppa som har arbeidd med desse bustadane er no ferdige med arbeidet sitt, og har sendt sine vurderingar og anbefalingar over til politisk avgjerd.

Innbyggarundersøking 

Pål Ranes orienterte om innbyggarundersøkinga «Korleis vil du bu i alderdommen eller om helsa sviktar?» , som kommunen har hatt gåande ei stund. Det er forresten ikkje for seint å bli med på undersøkinga, så vil ein vere med er det berre å gå inn på Surnadal kommune sine heimesider! 

Det har så langt kome inn rundt 350 svar, og det har kome inn svar frå alle delar av kommunen. Dei fleste som har svara vil bli buande heime som lenge som mogleg, men mange er avhengige av bil for å kunne utføre offentlege tenester.

Mange ønsker seg leiligheiter med to soverom, men vil ikkje betale over 2,5 millionar.

I gruppa for personar med vedtak om heimetenester var det få som hadde svara i undersøkinga, så her vil kommunen ta grep for å få inn fleire svar.

Husbanken orienterte 

Solveig Seland frå Husbanken hadde to bolkar med orienteringar. I den første bolken orienterte ho om Husbanken sine overordna mål og politiske føringar.

Alle skal ha ein trygg og sikker bustad er Husbanken sitt mål. Seland orienterte om Startlån som eit verkemiddel i høve til grupper som har problemer med å få finansiert eigen bustad gjennom ordinære finansinstitusjonar.

Ho orienterte også om Bustøtte, ei ordning som skal hjelpe grupper i låginntektssegmentet med å kunne fortsette å bu i eigen bustad, men bustøtte blir også gitt til personar som leiger bustad.

I den andre bolken til Seland tok ho for seg ulike buformer og viste eksemplar på slike frå Orkland, Heim, Åsane, Nannestad og Molde.

Ho orienterte også litt om Fortidsminneforeningen sitt prosjekt «Lys i alle hus», som er eit prosjekt med mål om at tomme hus skal kunne bli bustad for personar som treng hus. Eit fint døme på gjenbruk og berekraft.

Ulike bustadar og bustadområde

Einingsleiar for Areal- og naturforvaltning, Håvard Stensønes, tok for seg dei ulike buformene vi har i Surnadal kommune, der den desidert største delen av befolkninga bur i ein einebustad. Men utviklinga har dreid litt dei siste åra, og fleire og fleire har flytta inn i leilegheiter.

Stensønes viste også fram kart som synte at det var kommunale tomter rundt om i heile kommunen, og at det i tillegg til bustadfelt også er mange frittståande tomter det er mogleg å bygge på om ein ønsker det. 

Stensønes fortalte at det kommunen nyttar Statistisk sentralbyrå sine tal for demografi i planlegginga si, både med tanke på å skaffe rett bustadar og etablere bustadfelt.

Han orienterte også litt om det mykje omtala bustadfeltet på Vollan, og at kommunen her såg for kanskje kunne sjå for seg ein kombinasjon av einebustadar, rekkehus og lenkehus, for å oppnå ei større utnytting av feltet.

NAV ein viktig støttespelar 

Anne Guri Aase frå NAV Indre Nordmøre orienterte som søknadsprosessen for startlån. Ho orienterte også om at ein kan få startlån for å kjøpe bustad, for å behalde bustad - gjennom ei refinansiering og startlån for å gjere tilpassingar av eksisterande bustad.

NAV er opptekne av at bustadane skal vere trygge og hensiktsmessige, samstundes som personane som bur i bustadane skal ha eit økonomisk fundament for å kunne bu der.

Orientering frå byggesaksavdelinga 

Maren Lovise Øby og Ragna Kvendset frå Surnadal kommune si byggesaksavdeling orienterte litt om prosjekt der eldre næringsbygg har blitt bygd om til bustadar.

Dei viste også fram prosjekt der det er bygd leilegheiter ute i bygdene, som til dømes i Sanitetshuset i Todalen, der Todalen sanitetsforening i 1980 bygde fire leilegheiter med tilhøyrande fellesareal.

Alle har eit ønske om å bu i nærmiljøet sitt, sjølv om dei ikkje kan bu i huset sitt lenger, så da må det leggast til rette for bygging av leilegheiter for eldre også i bygdene sa Kvendset. 

Dei to damene ønskte elles alle interesserte velkomne innom for ein hyggeleg bustadprat!

Kommunedirektøren oppsummerte dagen 

Vi må rette blikket framover og finne dei buformene som er best tilpassa denne, sa kommunedirektør Lars Inge Kvande under si oppsummering av dagen.

Han var også klar på at Surnadal kommune må bygge eit helsehus for å stå best mogleg rusta for å møte toppen på eldrebølga, og for å ha nok hender for å utføre omsorgstenestene.

Interessant og informativt 

Boligdagen 2025 var ein interessant og informativ dag med mykje nyttig informasjon. Tinde Sparebank, SpareBank 1 Nordmøre og husbanken hadde alle tre standar under Boligdagen 2025, og den som ønskte det kunne finne informasjon både om finansiering og støtteordningar i samband med bustadbygging. Ein bra dag for dei som deltok!