Annonse
Salmesus i Stangvik kyrkje
Tysdag kveld blir ei fulltonande og lærerik stund i Stangvik-kyrkja. Publikum, konfirmantar, kor og kyrkjestab opnar salmeboka i full breidde.
«Norsk Salmebok 2013» er truleg landets rikaste samling av poesi og musikk. Dette har inspirert prest og konfirmantlærar Torbjørn Brøske til å dykke djupt i skattkista.
- For konfirmantane i Todalen, Åsskard og Stangvik blir dette ein annleis undervisningstime, seier Torbjørn. - Samtidig blir det ein open songkveld for publikum, og vi håpar mange møter opp og stemmer i!
Salmeboka har innhald med skikkeleg sus: Sterke tekster som handlar om alle livets faser og følelsar, frå heilagt alvor til jublande fryd. Musikk som biletleg tala kling i alle toneartar, frå danserytmer til melankoli.
Stangvik-presten har med seg damekoret Credo, leia av Surnadals-kantor Oddveig Helset Halle. Tidlegare korleiar frå Høgskulen i Levanger, Svein Volle, syng kjende «bedehussongar». Både Oddveig Halle og kollega Bernt Bøe gir tonefølgje.
Brøske knyter programmet saman – i rask sjumilsvandring gjennom historisk salmekultur. Emne som «Luther», «Fjerne himmelstrøk», «Folketonar» og «Forvaltaransvaret» fortel om variasjon og heilskap i songvalget.
Bernt Bøe lovar å røpe diktarpresten Petter Dass si spesielle tilknyting til nettopp Stangvika. - Men kva den bestod i, er det dei frammøtte som får vite, seier han …
ANNONSE:
