ANNONSE:

Kantate, julemotett og anna julegodt står på menyen, lovar korist Borghild Talgø, pianist Tor Strand og leiar Bernt Bøe.

Todalen og Åsskard søndag: Julegleda i tonar

Publisert

Koret P17 med solistar og orkester inviterer til tonande juleglede i Todalen og Åsskard kyrkjer søndag. Kantaten «I denne søte juletid» toppar eit rikhaldig program.

Koret har solide medaktørar. Songsolistar er Maia Reppe (sopran), Turid Røen Kroknes (alt) og Øystein Moe (tenor). Tor Strand trakterer orgel og piano. Frå Operaen i Kristiansund deltek Jasmina Zivic (fløyte), Ebba Ringmar (obo), Trond H. Saltnes og Odd Sonntag (fiolin), Anna Ostachowska (bratsj) og Zhala Aliyeva (cello).

Ensemblet (frå venstre): Anna Ostachowska, Jasmina Zivic, Ebba Ringmar, Zhala Aliyeva, Odd Sonntag og Trond Harald Saltnes.

Kantate som minimusikal

Største satsinga er kantaten «I denne søte juletid» av Arne Dagsvik, som mange kjenner frå korets CD og frå tidlegare konsertar. Gjennom ulike satsar blir juleevangeliet skildra i vare og varme klangar, i lengsel og festivitas. Verket innbyr til enkel scenisk regi. Her «blomstrar» øydemarka, her vandrar gjetarane «til Betlehem», her samlast koret ved Jesu krybbe. Før finalen tonar ut i tidlaus trass: «Nå er det fred på jorden!»

Prosjekt 17 ønskjer å skape juleglede også i år.

Julemotetten jubilerer

«Julemotett» av Eyvind Alnæs fyller 100 år og blir ikledd orkesterbunad i høve jubileet. Den hadde kanskje si første framføring på våre kantar nettopp i Åsskard alt i 1933: Med kyrkjekor, presten Fyrwald som solist og unge Leiv Bæverfjord i eit krevande orgelparti - på harmonium.

Klassisk og kortreist

Klassisk arvegods er også med: Damekor og instrument hentar fram Grubers originale Stille natt (Glade jul) frå 1818. Turid gir ein smak frå Bachs «Juleoratorium». Dertil julemusikk av Jean Sibelius, T. W. Aas, Bernt Bøe – og så «Julverset» i orkesterutgåve.

Søndagens publikum kan også vera utøvarar - i kjende og kjære julesongar som er arrangerte for allsong, kor og orkester.

Det ligg an til fulltonande julemusikk i Todalen og Åsskard denne søndagen!

Konsertane er støtta av Møre bispedøme, fylket, Talgø, Sparebank 1 Nordmøre og Gjensidige.

ANNONSE:

Powered by Labrador CMS