Tema på hjul

Sjølve programmet var eit fleirfoldig biletkåseri der over hundre års trafikkhistorie og ei mengd blankpussa veteranbilar pryda lerretet. Men også på parkeringplassen utafor museet tala temaet sitt tydelege språk. Begeistringa over historiske kjørety var til å ta og føle på. Entusiastar vart blanke i augo, og fagpraten gjekk livleg både inne og ute.

Hovudkåsør var Morten Betten. Han imponerte stort med flotte foto både frå privat bilpark, frå utviklinga av bilismen etter «frisleppet» i 1960 - og også frå bilens barndom sist på 1800-talet.

Morten røpa enorm detaljkunnskap om alle bilmodellar og eigenskapane deira. Statistikken over bilsalg og bruk tiår for tiår kasta lys over ein viktig del av utviklinga i det moderne samfunnet.

Også Arnt Kjetil Bøe og Jon Storløkken hadde fascinerande bidrag i form av foto og gode kommentarar.

Historielaget presenterte bakgrunnsstoff med utvalde bilete frå sitt rikhaldige arkiv – også med traktor, buss og lastebil. Kavalkaden viste lokale kjørety, sjåførar og passasjerar i over hundre års perspektiv.

Blant dei 70 i salen var interessa og fagkunnskapen stor, og kommentarane sat laust. Ein idealsituasjon for alle program-arrangørar!

Kjøkenet fekk lovord for velsmakande kaffetilbod - graut og bakels, varm eplekake med krem og alt som godt var.

Og etterpå heldt praten fram utafor husets vegger – der mange lekre veterankjørety kasta glans over dagen.