Olsok i Åsskard

Olsokhøgtida viser opphavet til norsk kyrkjeliv. Ved søndagens messe i Åsskard vil prestevikar Sylviane Jacques Denis knyte tradisjon og notid saman.

Sylviane er prestedotter - fødd og oppvaksen på Madagaskar. I ein prat da vi møtte henne i Åsskard-kyrkja nyleg, framhevar ho mykje positivt om norsk misjonsinnsats og sosialt arbeid i heimlandet hennar opp gjennom tidene.

– Og mange kyrkjer på Madagaskar liknar jo denne, seier ho og trur misjonærar kan ha brakt stilen dit.

Frå Madagaskar og hit

Ho kom til Norge i 2014 og har budd mykje i Ulsteinvik på Sunnmøre utanom 6 år som teologistudent i Stavanger. Nettopp ferdig med studiet valde ho jobb i staden for ferie i sommar. Tre veker er ho no prestevikar i Surnadal - der første oppdraget altså er søndagens olsokgudsteneste i Åsskard kyrkje.

Som nyutdanna vil ho det komande året arbeide som prostiprest i Kristiansund og Frei. Ordinasjon vil skje til hausten.

Likar Nordmøre

Sylviane har sommarbustad i «Buret» på Settem i Bøfjorden og trivst godt i bygda.

– Dette området er for lite kjent, synest ho og gler seg på turar i det flotte landskapet.

– Frå Buret går det jo direkte turløype opp til fjellet, og det passar meg godt! seier ho.

Olsok – minnet om Heilag Olav og kristninga av landet – har sterke tradisjonar. Alt no er tusenårsmarkeringa i 2030 under nasjonal planlegging (og debatt).

Sjøl med lite bålbrenning og anna lokal feiring på sjølve Olavsdagen laurdag, vil olsok prege denne søndagen i Åsskard. Etter gudstenesta i kyrkja er det som vanleg ope hus på Bøfjorden Sjøbruksmuseum. Og ved dette høvet med «Olsok og primstav» som tema for kåseri og biletframsyning.

– Oj. Det passar jo ypperleg! seier prestevikar Sylviane og har absolutt tenkt seg dit.