Flott innsats av klubben

5. mars var årets andre midt-norske meisterskap i taekwon do arrangert i Rosenborghallen. Surnadalsklubben stilte med fire deltakarar, to coachar og ein dommar.

Søstrene Mari og Jorun Fiske har begge svart belte, 2. dan og lang fartstid i sporten. Dei har drive med tkd sidan dei var ti år. Det er mange ulike roller som skal fyllast i tkd, og coachane har ei viktig rolle under konkurransar. Dei er med som støtte for utøvarane og står på sidelina ved ringen, gjev råd og passar på at utøvarene har det dei treng og kjenner seg trygg.

Veslesøster Heidi Fiske har og drive med tkd lenge, og ho har denne helga vore på dommarkurs i Trondheim, og dømde sine første konkurransar under midt-norsk meisterskap. Å gå dommarkurs er ein del av utdanninga/graderingssystemet, og eit steg på vegen mot å gradere seg til 2. dan.

To gutar og to jenter reiste oppover i dag. Joel Sveberg (grønt belte) fekk blod på tann etter gode resultat da han debuterte førre meisterskap, og vann sin klasse i sparring i dag. Ulrik Akrim (raudt belte) har eit par meisterskap meir på baken, men mangla gull frå midt-norsk, og det ordna seg i sparring i dag.

Simone Akrim (raudt belte) deltok for første gong i sparring. Ho leia bronsefinalen til det var att ti sekund, men da glapp det dessverre. Nathalie Nordlund (gult belte) har ikkje trena tkd så lenge, men gjorde det veldig bra førre meisterskap. Denne gongen vart dessverre klassen hennar avlyst, så ho fekk ikkje konkurrert.

Vi gratulerer heile gjengen med super innsats.