Bøfjordhelga:
Nyfjøs og entusiasme i Bøfjord
Optimisme er fellesnemnar for Bøfjordhelga 2026. Starten fredag bar preg av det.
At unge bønder har framtidsvisjonar, signaliserer tru og innsatsvilje i den lille bygda. I fjor kunne gardane Staknes og Dragset ta i bruk nye driftsbygningar.
Tredje nyfjøs i bygda
Fredag vart det moderne nyfjøset i Søgarden opna - med mange frammøtte i ei inkluderande sosial ramme. Det vanka pølser og brød, kaffe og gratulasjonskake på alle.
Omvisninga i fjøset var ein imponerande demonstrasjon av høgt teknisk nivå i dagens husdyrhald. Senior Ola Bø (79), kunne bekrefte ei enorm utvikling i hans tid på garden.
Oppslutning og interesse blant unge og vaksne frå nærmiljø og nabobygder viser også at bygdene ønskjer å vera liv laga - i rette forstand.
Fotball og entusiasme
Annonse
Leikarvollen fotballbane var arena for del 2 av fredagens program. Lag frå Halsa og Bøfjorden møttest i ein frisk vennskapskamp. Med aldersspenn mellom 18 og 60 år viser vennskapskampar som dette behovet for og verdien av fellesskap også innan idrett.
Eit stort og begeistr publikum understreka entusiasmen som pregar små bygder - sjøl om dei til dagleg ikkje kan rekruttere lag i seriefotballen. Topp underhaldning.
Nivåforskjellen var mindre enn resultatet 10-1 til Bøfjord kunne tyde på. Men heimelaget hadde eit par spelarar på nivå over snittet, og det gjorde nok utslaget. Særleg vart Birk Blekken med sine 6 mål og hans innlånte KBK-kamerat Eliah Solskjær lagt merke til.
Quiz med fin stemning
Etter kampen - og leiken - med lærkula vart første dag av Bøfjordhelga avrunda med quiz-konkurranse på Restaurant Stønt (Elvanesset). Linda Therese Bøe var regissør, og dei mange deltakarane hadde ei fin og spennande stund i lag.
