Kjenner du til NORSØK, NIBIO, KriVi eller Agropub

Turen gjekk frå Surnadal via Halsa-Kanestrøm til Tingvoll og tilbake om Rykkjem-Kvanne.

Tingvoll gard

På Tingvoll gard vart vi mottekne og fekk orientering av dagleg leiar hos NORSØK, Turid Strøm. Ho gav oss ei orientering om det som foregår på eigedommen Tingvoll gard og om historia bak NORSØK og dei andre organisasjonane som held hus på området.

NORSØK

NORSØK er ei sjølvstendig stifting og største arbeidsplassen på Tingvoll gard med 27 tilsette. Det er eit nasjonalt kompetansesenter for tverfagleg forsking og kunnskapsformidling for å utvikle økologisk landbruk.

NIBIO

Norsk institutt for bioøkonomi (NIBIO) er eit statleg forvaltningsorgan som har 14 tilsette på Tingvoll, men om lag 700 på landsbasis. NIBIO forskar og leverer kunnskap om mat- og planteproduksjon med meir, men er her mest kjent for viltforvaltning.

I tillegg har Tingvoll gard ein som forpaktar gardsdrifta, 3 personar som driv med miljøfaglege utgreiingar og Landbruk Nordvest har ein person tilsett. I tillegg til desse 46 kjem sesongtilsette og ekstra innleigde.

Meir om NORSØK

Tingvoll gard er eit gardsbruk og NORSØK arbeider mykje med dyrevelferd, både innan forskning og innan formidling. NORSØK hadde 226 foredrag i 2022.

Stjernehagen

Stjernehagen på Tingvoll gard er ein demonstrasjonshage. Det er også ein skolehage for Tingvollskolen. Elevar i 4. klasse har kvar sitt område - "Flekken min" - som dei har ansvar for. Her fekk vi grundig omvisning av Susanne Friis Pedersen.

Småhagebruk og andelshagar er populært, og det har vore halde kjøkkenhagekurs for 100 deltakarar.

Bioenergi

Neste post var besøk i det nye fjøset litt ovafor den andre bygningsmassen. Det var eit trebygg, rundt, med foringsplass i sentrum. Dyra kunne gå ute under overbygd "terrasse".

Ingvar Kvande møtte oss ved fjøset for å fortelle oss om Tingvoll sol- og bioenegisenter, og særleg om biogassanlegget som bygger på husdyrgjødsla frå fjøset.

Av om lag 700 tonn husdyrgjødsel produserer biogassanlegget gass til ein Stirlingmotor som lagar ca 20 kw strøm til bygga på Tingvoll gard.

Dei samarbeider og er rådgjevarar for fleire slike biogassanlegg i fylket, også eit anlegg i Surnadal.

KriVi Vev

Bak dette namnet står Kristine Hagen og Viktor Gautvik som i 1988 starta dette veveriet som i dag held hus på industriområdet på Saghøgda i Tingvoll sentrum. Ved å ta starten av fornamna sine, vart namnet KriVi

KriVi er einaste linveveriet i Norge, men veveriet lagar mange slags stoff. Bedrifta har 22 tilsette og omsette for 20 mill. i 2022. To designere arbeider for KriVi, ein frå Bergen og ein frå Oslo.

I "vevstøggu" var maskinene i gang med oppgavene sine.

Ein av vevstolane er for Jacquard-vevnad, og den kan matast med flotte mønster. KriVi har levert dukar og anna tekstilar til Oslo Rådhus, til alle norske ambassadar og til Sikkerhetsrådet i FN!

Krivi har fabrikkutsalg på Saghøgda

Etter ein lang sudiedag med mykje input, var det likevel noko som mangla - middag! Den vart det ordning på etter kvart.

På Tingvoll Fjordhotell vart all matlyst tilfredsstilt med baill-buffet! Men først fekk vi høre om skulane på Gyl, amtskule, husmorskule med meir, frå Helge Husby, og om økokommunen Tingvoll frå kommunaldirektør Odd Arild Bugge.

Men kva er Agropub?
Det er ei nasjonal nettside for økologisk landbruk. Toppartikkel no er frå ein av forskarane på NORSØK!