Tur til Gråfjellet

Sesongens siste fjelltur, tirsdag 27. september, er unnagjort.

Vi starta frå Nordvik, køyrde bomvegen opp til Nordviksetra. Derifrå guida Ingrid og Jan Nordvik oss vidare i lett, tørt og fint terreng etter den gamle turstien som går til Sula. Vi, 28 pensjonistar, snudde oss stadig for å nyte det flotte utsynet over fjord og fjell! Ein god stopp vart det ved Suloppkommet, der mange tok seg ein rein og forfriskande slurk vatn.

Litt lenger opp kom vi til eit vegskille, som viste sti til Sula og til Gråfjellet. Stien austover mot Gråfjellet var lett, tørr og slak. Men så vart vi overraska av ein skikkeleg stri og kald austavind. Difor vart turen litt amputert.

Vi søkte ly i steinura under Gråfjellet, der vi tok matpausen vår. Så vart det ein runde litt austover og rundt eit lite vatn før turen gjekk nedover mot Nordviksetra, der vi fekk eit overraskande og triveleg møte med ein geiteflokk.

Vi avslutta med endå ein hyggeleg kafferast ved hytta til Ingrid og Jan Nordvik.

Vi takkar for ein riktig god tursesong, og så møtest vi att til våren!

Og så håpar vi på ein triveleg avsutningskveld på Todalshytta, onsdag 5. oktober kl. 19.00.