Fjellgruppas tur til Skarven

Vi var 25 pensjonistar som fekk ein overlag fin fjelltur i det heilt perfekte turveret! Skikkeleg sommarver med over 20 grader, men heldigvis ein lett bris og litt dis!

Vi køyrde oppi Bøverdalen og parkerte ved Borstua på Seterbøen. Derifrå gjekk vi etter merka turløype, først eit stykke etter ein seterveg som går til Seterbøsetra, så etter ein sti heilt opp til toppvarden på Skarven, 649 moh. Bratt var det heile vegen, men både skogsvegen og stien var tørr og god. Og med ein matpause halvvegs og passeleg tempo for oss oppi åra, kom vi oss alle til topps. Og det flotte utsynet vi hadde rundt om til alle kantar!

Vi var alle samde i at vi hadde hatt ein særs fin fjelltur. Og så har vi jo det så triveleg og sosialt i lag!

Fjellgruppa i Surnadal pensjonistlag inviterer til fjelltur til Bollknobben i Todalen, tysdag 20. juni.

Oppmøte på parkeringsplassen nedafor Øye Kyrkje kl. 10.00 for samkøyring til Nordvik.
Vel møtt til fjelltur for kropp og sinn!