Lær å reparere kleda dine!

Onsdag kveld inviterer husflidslaget til fiksekveld i kantina ved Rindal skole. I ei tid kor det blir meir og meir klart at vi må ta grep for å leve meir berekraftig, er det viktig å redusere forbruket vårt, og på klesfronten har vel dei fleste av oss litt å gå på. Med enkle teknikkar kan vi reparere dei kleda vi har, og få dei til å halde lenger. No når mange har strammare økonomi, er det jo gunstig for lommeboka også.

Noregs Husflidslag har ei stund hatt gjenbruk, re-design, haldbarheit og reparasjon som satsingsfelt, og bidreg med materialpakkar til lokallaga slik at dei skal kunne arrangere fiksekveldar. Somme plassar har dei og starta fiksarlaug med faste treff. Gjennom foredrag på nettet har husflidslaget sentralt bidrege med teknikkar og tips til korleis arrangere fiksetreff.

Rindal husflidslag brukar å få støtte frå Rindal sparebank, og i fjor fekk dei eit større beløp øremerka arbeid for berekraft, og dei vil gjerne bruke det til nytte for folk i bygda. Målgruppa for treffet er alle som har lyst, og dei ser for seg at dette er nyttig for småbarnsforeldre som vil at klede skal gå i arv mellom barna. Om det blir stor interesse kan dette bli eit arrangement som gjentek seg, og kan eventuelt kombinerast med klesbyttedagar. Det er og absolutt lov for mannfolk å delta. Kanskje treng nokon å lære å sy i ein knapp?

Det er gratis å delta på fiksekvelden, og denne gongen held husflidslaget alt som trengst av materiale og utstyr. Dei kjem til å vere der fram til 21.00, og det er berre å stikke innom når ein vil, kanskje medan ungane er på trening? Dette er eit lågterskeltilbod, inspirerande og sosialt.

Du treng ikkje kunne noko spesielt frå før. Hit kjem du for å sjå og lære enkle teknikkar. Ta gjerne med litt ulike ting som treng å reparerast. Her kan du blant anna få tips om stopping av strikkastrømper, ullundertøy og reparasjon av syntetiske materiale.

TV-program som Symesterskapet og influensarar som blant andre Jenny Skavlan har vore med å gjere det trendy å reparere og å sy om klede. Re-design og personleg vri på kleda er populært. Dette er jo ikkje nytt, og vi damene mimra om omsydde klede vi brukte på 70- og 80-talet, men etterkvart har det vorte ein enorm tilgang på rimelege klede, og vi har ikkje hatt behov for å reparere og gjenbruke.

ANNONSE: