Bøfjordhelga
Juniorane raskast over Blåfjellet
Som ein del av programmet under Bøfjordhelga, arrangerte Bøfjord IL og Halsa IL det tradisjonsrike terrengløpet Blåfjelløpet. Løypa gjekk som vanleg frå Dragset i Bøfjorden og over til nabokommunen Heim med målgang på Halsa stadion, ein distanse på godt over ti kilometer.
Årets utgåve vart arrangert i stålande vêr med nære på tropetemperatur og sol frå ein skyfri himmel. Godvêret gjorde at løypa var tørr og fin, og det vart ein skikkeleg varm tur for deltakarane på den store mila over fjellet.
– Tørr og fin trase, men litt for varmt, sa vinnar Olav Fugelsøy etter løpet.
Løpet hadde også i år både trimklasse og konkurranseklasse, der trimklassen starta frå klokka 10, medan konkurranseklassen hadde start klokka 12.
Raskaste deltakar over fjellet vart altså junioren Olav Fugelsøy, som representerer Rindal IL . Han vart dermed vinnar av juniorklassen, framfor Håkon Bøklep, også han Rindal IL. Bente Jeanette Foss frå NTNU vart raskaste kvinne over fjellet.
Fullstendig resultatliste kan ein sjå på https://live.eqtiming.com/76458#dashboard
I trimklassen var det totalt 19 deltakarar, medan konkurranseklassen hadde 21 deltakarar, noko arrangørane frå dei to idrettslaga var godt nøgde med, sett i ly av varmen.
Annonse
