Frustrasjon rundt kommuneøkonomien

Dårlege utsikter for Todalsfjordprosjektet

Ordførar Hugo Pedersen hadde ei orientering i starten av møtet, der han mellom anna kom inn på Todalsfjordprosjektet, og at fylkeskommunedirektør Toril Hovdenak har uttalt at det er lite sannsynleg at bygging av Todalsfjordkryssinga kan komme i gang i løpet av dei næraste ti åra. 

Forslag om nedlegging av påbygg ved Surnadal vgs.

Ordføraren nevnte óg saka om skole- og tilbodsstruktur for vidaregande opplæring 2026-2040, som skal behandlast i eit møte i Kompetanse- og næringsutvalet i Møre og Romsdal fylke på mandag. Det viktigaste for Surnadal er forslaget om nedlegging av påbygging til generell studiekompetanse ved Surnadal vidaregåande skole. Ordføraren oppfordra til at kommunestyret lagar ein felles uttale i saka (sjå vedtaket nederst i saka).

Ny leiarstruktur

Kommunedirektør Lars inge Kvande hadde óg ei kort orientering, der han mellom anna informerte om endringane i leiarstrukturen i kommunen, som trer i kraft 1. januar 2026. Marit Sjøsæter har nyleg takka ja til stillinga som einingsleiar for sentrumsbarnehagane, Gro Kvammen Sæter har takka ja til stillinga som einingsleiar for oppvekstsentra og Torbjørn Larsen har takka ja til stillinga som einingsleiar for den nye kultureininga. Det er óg avklart at det blir ei ekstern utlysing på stillinga som kommunalsjef for den nye eininga for livsløp, som er ei samanslåing av dagens einingar oppvekst og helse og omsorg. Kommunedirektøren sa at det blir jobba vidare med nye stillingar til dei som no mister stillingane sine som einingsleiarar.

Flyttar Frivilligsentralen

Kommunesdirektøren opplyste óg at leigeavtalen med Møbel-Fiske AS Boligservice om leige av lokalar til Frivilligsentralen og ungdomsklubben no er sagt opp. Svorka-salen i kulturhuset skal no delast opp, og bli nye lokale til Frivilligsentralen, samt eit mindre møterom. Ombygginga startar snart, så dette kommunestyremøtet er det siste som blir halde i Svorka-salen. Det nye lokalet til Frivilligsentralen skal etter plana stå ferdig tidleg neste år.

Tertialrapport og budsjettregulering

Saksdokumenta til møtet kan ei sjå på Surnadal kommune si heimeside.

Kommunedirektør Lars Inge Kvande og økonomisjef Vibeke Langli la fram den siste tertialrapporten, og forslag til budsjettregulering.

Einingane har eit samla meirforbruk på 6,6 millionar kroner. Bakgrunnen for avvika er godt forklart i tertialraporten. Til sammen med tenesteområda og sentrale inntekter og utgifter så ligg kommunen no på eit negativt netto driftsresultat på om lag 9,9 millionar kroner.

Ny liste med innnsparingstiltak

Kommunedirektøren informerte óg litt om forslaget til økonomi- og handlingsplan for perioden 2026 - 2029, som no blir sendt ut til dei ulike utvala i kommunen. Formannskapet skal behandle dette og sende det ut på høyring, før endelig behadnling i kommunestyret 18. desember.

Forslaget til økonomi- og handlingsplan inneheld mellom anna ei ny tiltaksliste med innsparingstiltak. Dei fleste av tiltaka som er foreslått her får ikkje heilårseffekt før i 2027.

Fleire representantar tok ordet i saka, og ga uttrykk for frustrasjon. Nokre av dei uttrykte bekymring for at reduksjonen i årsverk ikkje har vore like stor som forventa etter dei vedtaka som har vore gjort tidlegare.

Kommunestyret vedtok einstemmig å ta tertialrapporten for andre tertialt til orientering, og forslaget til budsjettregulering vart óg einstemmig vedteke.

Framtida for Kleivafondet

Kommunedirektøren la fram eit nytt forslag om behandlinga av saker om framtida til Kleivafondet. Det har vore gjort nye vurderingar knytt til desse forholda, som har vore vekta opp mot intensjonen i Formannskapet sitt vedtak om å vurdere å opprette eit rådgjevande utval. Kommunedirektøren rår, ut i frå ei samla vurdering, til at det ikkje vert opprette eit formelt utval i tråd med Kommunelova sine reglar. Dette med bakgrunn i dei begrensningar som m.a. valbarheit medfører. Kommuendirektøren foreslo derfor at saker som angår Kleivafondet blir handsama i aktuelle politiske og eventuelle andre vedtaksfora i løpet av vinteren 2025/2026. Dette forslaget vart einstemmig vedteke i kommunestyret.

--

Uttale om fylkeskommunedirektøren sitt forslag til endring av innhald i Surnadal vidaregåande skole

Kommunestyret vedtok einstemmig følgande uttale om tilbodsstruktur ved Surnadal videaregående skole:

Uttale frå Surnadal kommunestyre vedrørande tilbodsstruktur ved Surnadal vidaregåande skule 

Surnadal kommunestyre viser til innstilling frå fylkeskommunedirektøren om ny skulestruktur i Møre og Romsdal, der det blir foreslått å ta bort påbyggstilboda Pb3 og Pb4 ved Surnadal vidaregåande skule og samle desse ved Sunndal vidaregåande skule. Kommunestyret ser med stor uro på denne utviklinga og vil med dette uttrykke sterk motstand mot forslaget. 

Kommunestyret støttar fullt ut uttalen frå skoleutvalet ved Surnadal vgs, og vil særleg peike på følgande moment: 

• Tilgjengelegheit og geografi: Surnadal har ei meir sentral plassering for elevar frå Indre Nordmøre, inkludert Rindal og tidlegare Halsa kommune. For desse elevane vil reiseveg til Sunndal vere urimeleg lang, og det vil svekke tilgangen til vidaregåande opplæring i regionen. 

• Søkjartal og kapasitetsgrunnlag: Det er marginale forskjellar i søkjartal mellom Surnadal og Sunndal. I inneverande skuleår var det faktisk Surnadal som hadde høgast søkjartal og kunne starte klasse, medan Sunndal ikkje kunne det. Dette viser at det er grunnlag for å vidareføre tilbodet i Surnadal. 

• Konsekvensar for rekruttering og regionen: Dersom påbyggstilbodet blir fjerna frå Surnadal, vil elevar frå nærområda i større grad velje vidaregåande skule i Trøndelag. Dette vil føre til at elevane ikkje blir i regionen vår. 

Konklusjon; 

• Surnadal kommunestyre vil sterkt rå til at både Pb3 og Pb4 tilboda vert vidareført på Surnadal vidaregåande skule. Påbygg 3 og påbygg 4 har også vist seg å gje eit svært godt læringsmiljø for elevane som har kome inn på desse linjene. 

• Kommunestyret meiner at ei svekking av det lokale tilbodet ved Surnadal vgs vil ha alvorlege konsekvensar for både skulen og regionen. Vi oppfordrar fylkestinget til å ta omsyn til dei geografiske, pedagogiske og samfunnsmessige argumenta som er framlagt, og til å sikre at påbyggstilbodet Pb3 og Pb4 blir vidareført ved Surnadal vidaregåande skule.

--

Sjå heile møtet i opptak på Kommune-TV: