Grøne fingrar og gode relasjonar

Solveig Haglund bur saman med Martin Gausen på garden Oppistua Øye, og der driv ho med økologisk småskala grønsaksproduksjon og dyrkar urtar, bær og frukt. Ho har den siste tida arbeidd med å gjere klar jorda for dyrking, og er no klar for å ta imot folk som ønskjer å leie eit stykke jord i parsellhagen. 

Kjem til dekka bord

Ein parsellhage er eit areal med dyrkingsjord, delt inn i parseller med ulik storleik som kan bli leid av folk som vil dyrke grønsaker, urtar, blomar og meir. 

Her kjem ein til "dekka bord" og slepp unna mykje av forarbeidet med dyrkinga. Jorda er ferdig pløyd, frest, harva og gjødsla, og det er klart for å dyrke. Den som leier parsell har ansvar for dyrking, vatning, luking av ugras, og stell av vekstane. Ein kjem og går til hagen som ein vil.

Alt av utstyr ein treng for dyrking er å få lånt på garden, og vatn og utstyr er lett tilgjengeleg. Jorda ligg i eit svært solrikt område, så her er alle føresetnader på plass for å lykkes. 

Lågterskel

Det er fjerde året det blir lagt ut parsellar til leie på Oppistua Øye, og det har vore folk i forskjellige aldrar som har hatt nytte av tilbodet. 

– Her er alle velkomne, ungdom, eldre, barn og heile familiar, seier Solveig.

Solveig fortel at av dei som har leid parsell, har det vore folk med mykje erfaring med hage og dyrking, og folk som ikkje har noko erfaring i det heile tatt.

– Eg er her og kan gi tips og råd, og ein kan lære mykje av kvarandre, seier Solveig.

Ein parsell kan vere kjekt for nokon som har flytta til ei leilighet, og saknar det å ha ein hage. Nokon ønskjer kanskje å bruke parsellen som ein inngang til å lære om dyrking, for å starte dyrking heime etter ei stund. 

Det å ha parsell er uforpliktande, da ein leier for ein sesong om gangen. På den måten er det perfekt for den som ønskjer å prøve seg litt med dyrking, eller for den som ikkje har ein eigna plass for dyrking sjølv.

Ein sosial arena

Formålet til Solveig med å legge ut parseller til leie er å skape ein sosial arena der folk kan møtast på tvers av alder, bakgrunn og erfaring, og lære av og med kvarandre.

Solveig håpar at parsellhagen kan bli ein trygt og sosial stad, òg for dei som er nye i bygda, eller nye i Noreg, og som er interessert i dyrking.

Hageland Surnadal har sponsa garden med bord og benkar, så det går an å ta med kaffekanna og ta ein prat i samband med dyrkinga. Garden ligg i nydelege omgjevnadar, så det er gode moglegheiter for å skape sommarminner med dyrking og fellesskap nede på Øyamoan.

Eit godt tips frå Solveig er å gå saman fleire om å leie parsell. Det kan vere to venner, eller to familiar som dyrkar saman og deler på ansvaret. Ein kan òg gjere avtalar med dei andre som har parsell, om å samarbeide om vatning og stell.