- Det er berre to bautaer i Rindal, og begge hyller personar frå Romundstadbygda

xRindal Pensjonistlag og Rådet for eldre og mennesker med nedsatt funksjonsevne inviterte til feiring med kåseri, musikk og middag på Bolme Pensjonat. Situasjonen med Covid-19-pandemien gjorde at det var begrensa antal plassar, men dei som hadde sikra seg plass, fekk ei hyggeleg stund.

Romundstadbygdtur

Reisa gjennom Romundstadbygda starta med Løsetgardane og heimplassen til Magne Løset, like ved travbanen i Rindal. Garden har mange namn, men vi kan halde oss til Løsetøyan og kalle kåsøren/turguiden for Magne Øyå. Mange visste at bestefaren var gammellensmannen i Rindal.

Elles var ein av dei beste skyttarane i landet frå Løsetgardane. Lars Løseth frå Flåtten var i omskyting med OL-vinnar og ein av dei beste skyttarane i verda, Willy Røgeberg, på landsskyttarstemnet i Steinkjer i 1937. Det var ingen skam å «tape» mot han.

Lenger aust ligg Røen, og der var det mange kjente menn, mellom anna Sigurd Røen som står som statue i Rindal sentrum. Han har 179 premier, og berre 9 er dårlegare enn 5.plass. Høgast er kanskje Hitlers Ærespris frå 1937 og gullmedaljane i kombinert og stafett i VM same året.

Rørdalsvisa

Rørdalsvisa, ein framtidsvisjon om nydyrkargrenda Rørdalen frå 1928, er signert Ingebrigt Røen. Mykje av visjonane forfattaren hadde er gått i oppfylling – miksmaster og konebil er normalt idag, og enda er det ikkje gått 100 år!

I nær fortid fekk Norge med Torgeir Nergård både OL-, VM- og EM-gull i curling. Far hans voks opp i Romundstadbygda.

På sørsida, skuggesida, av bygda ligg gardane Kroken og Reinsli. Astrid Krog Halse stammar derifrå, og ho fekk vi møte gjennom Karstein Mauset som har tonesett mange av dikta hennar.

Kona til Jakob Sande stammar også frå denne grenda, kunne Magne Øyå fortelle.

Neste stopp var hos formannskapslovas far, John Neergaard. Bautaen over han står like ved fylkesvegen og er den første bautaen over ein rindaling.

Frå Yttgarden på Romundstad kom mor til kona til Knut Hamsun, og i sitt åttiande år besøkte han Rindal i lag med kona Marie for å sjå bygda ho stamma frå.

Gründer

Den største gründaren i Rindal kjem også frå Romundstadbygda. Emil Gåsvand starta tre-eventyret sitt ved Kysinga for å utvide ved travbanen i Løsetøyan før han enda opp med mange store bygg på industriområdet i Bjergen – Rindalshytter, Rindalslist og Gåsvand Eiendom.

I same slengen nemner vi gründaren Olav Storli, som stod bak Rindal Trelast og Rindal Bulldozarlag

Songarinna

Turid Røen Kroknes er frå Flålia, frilanssongar som no bur i Valsøyfjord, er kanskje meir kjent utanom Rindal. Ho har fått Halsa kommunes kulturpris og Bræinprisen for formidling av nordmørske folketonar. Ho har gjort mange roller ved distriktsoperaene rundt om i landet, og har vore på turne med Den Norske Opera. Særleg lang fartstid har ho ved Operaen i Kristiansund. Ho har og sunge altpartia ved mange store kyrkjemusikalske verk, og er stadig aktiv med konsertar. Ho har opptrått i Universitetets Aula i Oslo, Festspela i Bergen og mange gonger i Nidarosdomen.

Fleire idrettsmenn

Mikal Kirkholt – sølv stafett under OL 1952, Torvald Heggem 4 kongepokalar og Hitlers Ærespris, den andre i Romundstadbygda! Det vart delt ut berre 5 slike æresprisar. Lenger aust budde Reidar Helgetun, som vart verdensmester i militært patruljeløp i lag med Magnar Ingebrigtsli og Tore Bjørnstad frå Rindal og Odd Lykkja frå Meldal.

Og til slutt nemner vi at oldemor til Ole Gunnar Solskjær kjem frå Friktrøa.

Det vil vere ein god idé å repetere denne "turen" med buss!

Fredlaus

Karstein Mauset gledde forsamlinga med mange av sine eigne viser. Han har tonesett dikt av Hans Hyldbakk, Astrid Krog Halse og Ingeborg Solem. Fleire av visene var frå den siste CDen, Fredlaus, som det var høve til å få kjøpe.