Annonse
Orgelstafett
«Instrumentenes prinsesse» i tale
Orgelstudentar musiserer i Mo, Todalen, Åsskard og Øye kyrkjer torsdag denne veka. Vårsøghelga slår eit slag for «Instrumentenes dronning».
Dronning-tittelen
var visst Mozarts påfunn. Våre lokale orgel helst er vel for små «prinsesser» å
rekne. Men desse bygdene har ein lekker orgelpark - etter prisverdig
gjevarinnsats av kyrkjefolket i nyare tid.
Sjeldan vare
Slik fortener folket å få oppleve flott musikk på instrumenta dei sjølve er eigarar av. Vel er orgelet og organisten regelmessig å høre, i breitt musikalsk spekter, ved gudstenester og kyrkjege handlingar. Men rein orgelkonsert er sjeldan vare.
Tiltak mot nedprioritering
Da er det prisverdig at Vårsøghelga har hyra studentane Johannes Høyland, Tove Kyvik, Solveig Karoline Flekstad Vik og Patrick J. Pöppel til å utfalde seg her denne torsdagen. Dei har spenstig og variert musikk på programmet.
- Tiltaket er også vinkla mot nedprioriteringa av kyrkjemusikk ved Institutt for musikk ved NTNU og mot organistmangelen i distrikta, seier Vårsøg-leiar Anders Larsen.
Lokalt er det faktisk eit håp
at nokon av dei aktuelle solistane kan få lyst til å jobbe her.
Fin orgelpark
Mykje innsamlingsdugnad ligg bak finansieringa av nye orgel til dei aktuelle kyrkjene. Fantasien var stor, og kulturkveldar, kronerulling, basarar og andre tiltak skaffa mange hundretusen kroner i kvart sokn frå 1980-talet og utover.
Åsskard fekk i 1982 det danske firmaet Starup til å bygge nytt orgel. Dette er på 10 register - forenkla sagt «piperekkjer».
Øye kyrkje har eit Marcussen-orgel, også dansk, bygd i 1988. Dette er noko større enn Åsskard-orgelet.
Orgelet i Todalen er både eldre og nyare enn dei to nemnte. I 1932 gav «gullkongen» Fredrik Bruseth eit flott instrument til bygda der han stamma frå. Det var levert av Brødrene Torkildsen (Åsen i Trøndelag). I 1995 utvida og ombygde Henrik Brinck-Hansen dette. Her kling dermed både gamle piper frå 1932 og nye frå 1995. - Ikkje minst høver «romantisk» musikk godt her, seier gjestande organistar.
Mo kyrkje - bygd i 1728 - har eit orgel i
«barokkstil», som kan seiast å matche kyrkja sin alder. Det er bygd av Gebrüder
Reil frå Nederland i 1987 og var først i privat eige hos organist Johan Gjendem
i Elnesvågen. Mo sokn kjøpte det i 2004.
No kan altså folk i området få høre unge studentar utfalde seg og ulike komponistar på desse fire instrumenta.
