Gullkveld: Amerikabrev

«Forrige høst fandt vi en creek som nu viser sig at være det rigeste guldfund i America.»

Brevet frå Fredrik Bruseth til foreldra sommaren 1897 er eit gledessjokk. Med eitt slag er han blitt mangemillionær. Foreldra er redda frå gjeld og skam.

Brevet står å lese i boka Amerikabrev, der brev til og frå «Gullkongen» Fredrik Bruseth og fire søsken er samla. Alle drog dei til Amerika for å hjelpe foreldra økonomisk. Dei var «økonomiske flyktninger og lykkejegere», skriv Lars Ramsøy-Halle i forordet. Det er Lars som har samla breva frå medlemmer av sin eigen familie.

I tida framover blir Amerikabrev presentert fleire stader. Først ute er naturleg nok Bondehuset i Stangvika, finansiert av «Gullkongen» sjølv for meir enn 100 år sia.

Torsdag 9. november fortel Lars Ramsøy-Halle og Svein Sæter om boka og viser bilde frå det utrulege gullrushet til Klondike. Tidlegare har dei to samarbeidd om musikalen Stjernestøv, inspirert av det same stoffet.

Lars Ramsøy-Halle trykte eit mindre opplag av Amerikabrev for tre år sia, først og fremst med tanke på slekt og venner. No har Blomsterhaug forlag gjort andre utgåve av boka tilgjengeleg for langt fleire lesarar. Det er Prosjektet «Kunst og kulturformidling langs Den Trondhjemske postvei» som er arrangør.