Møre og Romsdal fylkeskommune
Bruinspeksjonar på Nordmøre
Frå 1. - 4. september og frå 9.-11. september skal det gjennomførast inspeksjon av fleire bruer i Aure og Surnadal kommuner, og to bruer på Smøla. Dette er siste vekene med inspeksjon på Nordmøre for i år.
I Surnadal kommune blir inspeksjonane på Vindøla og Vindøla GS-bru, Øye og Øye gangbru, Ørabrua, Haugafossbrua, Bøfjordbrua, Berset bru, Dønnem, Folla, Nordvik, Rosså og Bruset. Portalane til Svinviktunnelen skal også inspiserast. Arbeidet blir utført både på dagtid og kveldstid, og det blir nytta lift under inspeksjonane av bruene.
I Aure kommune skal Litlsundbrua, Foldfjordbrua, Mjosundbrua og Dromnessundbrua og Torsetsundbrua inspiserast. Portalane til Valatunnelen og Skiphamntunnelen skal også ha ein kontroll i same periode.
På Smøla blir det inspeksjon av Dampleia og noko arbeid på Langbrua
- Medan vi arbeidar vil smalare bruer bli heilt stengt i inntil 15 minutt. Bruer med to køyrefelt vil ha eitt felt ope, med manuell dirigering, opplyser bru- og kaiforvaltar Ingrid Anne Lervik i Møre og Romsdal fylkeskommune.
Ved inspeksjon av tunnelportalane vil det bli stenging i inntil 15 min. Buss i rute og utrykkingskøyretøy kan passere.
Dette er ein del av dei rutinemessige inspeksjonane som blir gjort på fylkesvegbruer. Dei er viktig for å sikre trafikktryggleiken.
