![Lars Gunnar Polden ved biletet "Å forskreva seg"](https://image.trollheimsporten.no/200793.webp?imageId=200793&x=0.00&y=12.80&cropw=99.91&croph=61.95&width=968&height=802&format=jpg)
– Eg vil lage bilete med fart i
Om lag 40 tok turen til Kallastua torsdag kveld då kunstnaren Lars Gunnar Polden opna utstilling i fødebygda med fargerike og levande bilete
Sjølv om Polden har levd det meste av livet sitt utanom bygda, har han røtter i Surnadal, der han var fødd i 1951. To år gamal flytta Lars Gunnar til Ålvundeid med familien, der han vaks opp.
![Stetfiskar](https://image.trollheimsporten.no/200801.webp?imageId=200801&x=0.00&y=0.00&cropw=97.15&croph=99.76&width=928&height=1120&format=jpg)
Torsdag fekk dei frammøtte servert eplemost frå Hardanger, i dag bur nemleg Polden i Kvam i Hardanger med kone og to barn. Men familien har òg feriebustad på Lykjeeidet i Surnadal.
Lars Gunnar Polden starta yrkesutdanninga si på reklamelina på Borgund yrkeskule, og fullførte utdanninga innan grafisk design med diplomoppgåve ved Bergen kunsthandsverkskule i 1976. Han har vore yrkesaktiv som biletkunstnar sidan det.
Lars har delteke på fleire gruppeutstillingar og separatutstillingar. Dei siste 15 åra har han i hovudsak stilt ut i eige galleri på Hjadlane, i Osa i Hardanger.
Frå Stetfiskar til himmelhus
Polden arbeider ofte i relativt store format i teknikkane olje på lerret, kol og pastell, men òg med små teikningar, akvarellar og raderingar. Han arbeidar i ulike motivkretsar og nyttar ofte humor, noko tittelen på bileta ofte avspeglar.
![Kattikkall](https://image.trollheimsporten.no/200799.webp?imageId=200799&x=0.00&y=0.00&cropw=100.00&croph=100.00&width=928&height=1422&format=jpg)
I sterke fargar og dramatisk komposisjon blir publikum introdusert for verk som «Å gjera kål på ei gulrot», «Kattikall» og «Stetfiskar». Alle bileta er produsert i løpet av dei tre siste åra. Han vil lage bilete med fart i.
![Å gjera kål på ei gulrot](https://image.trollheimsporten.no/200803.webp?imageId=200803&x=2.90&y=10.57&cropw=97.10&croph=80.83&width=956&height=1062&format=jpg)
Men her er òg alvor blanda inn i humoren. Under opninga vart eit bilete seld, og Polden fortel at han hadde ei spesiell oppleving med akkurat det bilete, som er kalla «Eit hus i himmelen»
Biletet er nemleg tileikna den avdøde lege og samfunnsdabatant Per Fugelli, som såg for seg at han, som ateist, ikkje fekk plass i himmelen. Dermed måla Polden eit «himmelhus» til Fugelli. Dette hadde kunstnaren hengt opp i vindauget, og ein dag ha kom gåande skein sola gjennom biletet og det var lys i himmelhuset til Fugelli.
![Kultursjef Lilli Husby introduserte Lars Gunnar Polden, medan ordførar Margrethe Svinvik held tale og sto for snorklippinga. Her saman med kunstnaren (t.v) og Lars Skrøvseth frå Stiftelsen Kallastua](https://image.trollheimsporten.no/200805.webp?imageId=200805&x=12.87&y=33.00&cropw=76.66&croph=44.26&width=956&height=546&format=jpg)
ANNONSE: