Nytt studietilbod i Møre og Romsdal: Demens og psykisk helse hos eldre

Fagskolen Møre og Romsdal utvidar no sitt helsefaglege studietilbod med utdanninga Demens og psykisk helse hos eldre, som blir tilbydd i samarbeid med Fagskolen Aldring og helse. Utdanninga blir tilbydd frå hausten 2026 med eigne klassar i både Kristiansund og Ålesund.

Utdanninga er særprega av si praksisnære form og er utvikla for tilsette i tenestene som ønsker fagleg påfyll som kan takast i bruk direkte i arbeidskvardagen. 

Studiet blir gjennomført som ei samlingsbasert, nettstøtta utdanning tilpassa yrkesaktive. Kvart semester startar med fire obligatoriske samlingsdagar, mens resten av undervisninga skjer i nettmøte med faglege drøftingar, samtalar og rettleiing. Studiet gir 60 studiepoeng over to år.

Fagskolen Aldring og helse inngår i Nasjonalt senter for aldring og helse, og utdanninga har vore eit etablert tilbod nasjonalt sidan 2008. Det blir no tilgjengeleg lokalt i Møre og Romsdal etter tydelege ønske frå kommunar og tilsette i regionen. Studiet gir fagpersonar i helse- og omsorgstenestene oppdatert kompetanse i møte med eit aukande antal eldre med demens og psykiske helseutfordringar.

– Det er svært positivt at Fagskolen Møre og Romsdal styrker sitt helsefaglege tilbod, seier rektor Helene Hanken ved Fagskolen Møre og Romsdal.

Rektor ved Fagskolen Aldring og helse, Signe Baksaas Gjelstad, er glad for samarbeidet med Fagskolen Møre og Romsdal:

– Vi skal samarbeide tett om både undervisning og fagmiljø, og Fagskolen Aldring og helse bidreg som akkreditert tilbydar med fagkompetanse i gjennomføringa. Slik får regionen eit styrka tilbod på eit område der kompetansebehovet aukar, seier Signe Baksaas Gjelstad.