Frå folkemusikk og spirituals til klassisk klaver

Til denne lanseringa stilte ho med musikarane Margaret Rensvik på flygel, Ronny Kjøsen med trekkspel og Øyvind Smidt på fele og mandolin.

- Det var stort å få framføre desse folketonane i Rindalskirka i kveld, sa Turid etter konserten.

Under konserten fekk vi både religiøse folketonar og folkemusikk, klassisk på flygel og spirituals.

Konserten var rein akustisk, og Turid og musikarane fylte Rindalskirka med gode, varme tonar i augustkvelden som smaka oktober. Vi fekk kjente og mindre kjente melodiar, variert arrangert av Ronny Kjøsen, men også Sommerro var representert.

Folketonane var henta frå nordmørsbygder og bore fram for oss av den fyldige altstemma til Turid Røen Kroknes. Musikarane fargela med akkompagnementet sitt og veksla på melodiføringa. Klimpringa frå mandolinen sette ekstra preg på salmen «Når mitt øye» frå Straumsnes.

Frå den nye heimkommunen til Turid, Halsa – eller rettare Heim, kom tonen til «Som den gyldne sol frembryter». Etter opning berre med fele som akkompagnement, kom sola meir og meir fram gjennom trekkspelltonane.

Folkemusikarane Ronny Kjøsen og Øyvind Smidt hadde også ei springleikkule med opphav i Lom, Heidal og får Ronny Kjøsen, og vi fekk ein bryllaupsmarsj Ronny hadde laga.

Margaret Rensvik hadde ei klassisk avdeling med eit melodiøst nattstykke, nocturne, av Chopin, som var bruka i filmen «The pianist» i 2002. Deretter fekk vi eit beroligande, luftig nattstykke av Edvard Grieg, der vi fekk med oss både nattergal og liten storm før roen senka seg.

Margaret Rensvik er kjent frå operaen i Kristiansund og frå Kristiansund Kyrkje Kunst Kulturfestival. I 2017 fekk ho Møre og Romsdal sin fylkeskulturpris. Ho er født i England.

Avdelinga med Spirituals vart innleia med «Steal away to Jesus» som slavane i dei amerikanske sørstatane trøysta seg med.
- Mange treng nok denne trøysta i verda i dag også, sa Turid.

Med songane sine tonesette slavane dei bibelske forteljingane. Det fekk vi eksempel på med framføringa av «Wade in the water». Moses leda Israelsfolket gjennom Rødehavet. Det var dramatisk, og det kom godt fram både gjennom solisten og akkompagnementet.

«Oh Peter, go ring them bells” vart livleg framført med himmelsk avslutning frå flygelet.

- Kvar hamnar vi, sa Turid, før ho gav oss si tolking av «Deres no hidin’ place», for deretter å dele «My Lord, what a morning» som summerte opp alt, og det meinte ho!

Avslutningssongen var « Blant engles kor» med folketone frå Tingvoll og tittel på den nye plata.

Publikum takka for konserten med ståande applaus - «My lord, what an evening»!

På CD-plata «Blant englers kor» er det Brage Einum som trakterer flygelet. Plata er innspela i Rindal kirke av Kultursmia/Ronny Kjøsen, og miksing og mastring er gjort av Ola Langli i Dreamfarm studio.