Tips 11: Langvatnet
Sommartur i Surnadal
Vakre haustfargar ved Langvatnet i oktober 2012. Alle foto: Norunn Holten
Fer ein på varmaste sommaren, kan det også vera muleg å bade eller leike ved Heggsetelva som følgjer vegen eit stykke. Dette er ein tur med lite stigning- ein typisk skogstur! Det er derfor ikkje så mykje utsikt å beundre på denne turen, men skogsvegen er idyllisk, og når ein er framme ved det vakre Langvatnet, gir naturen her valuta for innsatsen- anten ein er på tur eller ute for å trene.
Vi har vurdert turen som "grøn", altså eigna for nybegynnarar. Det er muleg å koma seg innover med barnevogn, og sjølv om det er bratt det første stykket opp frå riksvegen, har vi fått vita at denne vegen også er bruka av folk med elektrisk rullestol. Kanskje det da er køyrt med bil fram til bommen slik at den verste bratta er unnagjort?
Det er fisk i Langvatnet, så om fiskestanga er med, er det lov å prøve fiskelykka. Fiskekort kan kjøpast ved bommen på vestre Nordmarksvegen. Vi har også fått tips om at det er enda betre fiske i Svartvatnet,som ligg ikkje langt frå Langvatnet. For å koma dit må du ta av til høgre i vegskiljet du kjem til mot slutten av turen innover, og som er nemnt i beskrivinga av trase' i tabellen under.
Fakta om turen
Stad | Berset → Langvatnet → Berset |
Type tur | Vandring |
Gradering | Grøn (lett, passar nybegynnarar) |
Kulturminne | Nei |
Beskriving av kulturminne | - |
Turbeskriving- trase’ | Start ved riksvegen like ovanfor Berset der ein skogsveg går oppover lia. Du passerer ein bom og går vidare etter vegen etter å ha passert denne. Følg same vegen til den deler seg. Da tek du til venstre. Herifrå er det ikkje langt til snuplassen ved Langvatnet. Det går ein ganske våt sti vidare langs vatnet, og denne kan du følgje vidare om du er på jakt etter ein høveleg rasteplass ved det idylliske vatnet. |
Startpunkt | Venstresving på riksvegen like ovanfor Berset; ei sløyfe av gammelvegen ligg att i ytterkant, og det går opp ein skogsveg der. |
Sluttstad/turmål | Sluttstad: Som startpunkt.Turmål: Langvatnet. |
Parkering ved startpunkt | God plass til å parkere på gammelvegen. |
Type underlag | Skogsveg fram til snuplass ved Langvatnet. Derifrå går det ein blaut sti vidare. |
Stigning | Lite stigning på denne turen. Det er ei kneik opp frå startpunktet ved riksvegen, men når denne er forsert, er terrenget lett kupert. |
Total stigning | 130 m høgdeforskjell mellom startpunkt og snuplassen ved Langvatnet. |
Offentleg transport | Nettbuss har ruter forbi startpunktet, men dette er nok ein tur som lokalbefolkninga helst køyrer til. |
Spesielle forhold | Dersom du berre følgjer skogsvegen, kan du nøye deg med joggesko. Vil du fortsette vidare etter stien eller gå ned mot vatnet, er det ganske vått slik at tett fottøy er nødvendig. |
Kart |
Turkartet «Fjordruta» (1: 100 000) |
Klikk på bileta for å sjå dei større eller i serie!