Stangvikfestivalen blir omtala som ein kammermusikkfestival, men inneheld så mykje meir enn det. Vel står det både klassisk og samtidsmusikk på programmet, men det meste kan skje - og det skjer! - i løpet av festivaldagane i Stangvik.

Etter "tjuvstarten" i Pakkhuset i Todalen torsdag kveld (les meir om den her), var det fredag offisiell opning av årets festival i Prestegarden. Med rundt 80 tilhøyrarar var det fullt i konsertrommet, og dei frammøtte på intimkonserten fekk oppleve mellom anna nye komposisjonar i moderne lyddrakt, markering av 200-årsjubileet for Schumann sin fødsel - og stangvikræpp!

Etterpå var det klart for opninga av festivalutstillinga - fotoprosjektet "Stangvik 2010", der Yngvild Sæter har fotografert alle fastbuande stangvikgardingar. Dette prosjektet er meint som eit tidsbilde, i tråd med Hans Hyldbakk sitt arbeid med bygdebøker.

Seinare på fredagskvelden fortsette festivalen med Krimkveld i Bondehuset. Laurdag er det mellom anna konsertar i Rutlåven og Bondehuset, medan det søndag er klart for fotballturnering og boklansering på Svissholmen, "søskenborn-duell" mellom Gjermund og Anders Larsen i Stangvik kyrkje, og den tradisjonelle ønskekonserten.

Den er i år tileigna Benito Nava og hans restaurant Zia Teresa i Trondheim - ein restaurant Trygve "Terenzio" Brøske har sakna så sterkt at han har gitt Benito i oppgåve å finne tilbake til den unike stemninga, i form av musikalske, verbale og kulinariske høgdepunkt.

For komplett festivalprogram, sjå her.

Klikk på bilda under for større versjonar.

Poing - beståande av Rolf-Erik Nystrøm (saksofon), Frode Haltli (akkordeon) og Håkon Thelin (kontrabass) - deltok på opningskonserten med mellom anna festivalkomponist Maja Ratkje sin Essential extensions.

Yngvild Sæter, som no studerer ved Oslo Fotokunstskole, har fotografert alle dei fastbuande i Stangvik som del av prosjektet Stangvik 2010.

Trygve Brøske og Jo Inge Nes (midt på bildet) bidrog med musikk framført på melodika og fløyte-app til iPhone(!) under opninga av festivalutstillinga.

Festivalkunstnar Yngvild Sæter blir gratulert av stangvikgarding og tidlegare festivalkunstnar Brit Dyrnes.

Trond Wiger frå Trondheim dro til med heftig stangvikræpp i Prestegarden.

Tor Vang studerer festivalutstillingsbildet av seg sjølv og familien. - Vi stortrivst her, seier Vang, som saman med familien flytta til Stangvik for tre år sidan.